"Solıx çişmäse" tuqtatılıp tora

Törkiyäneñ “Solıx çişmäse” xäräkäte 5 köngä tuqtatılıp tora. Bu xaqta tışqı êşlär ministrı Mäwlet Çavuşoğlu xäbär itte. Ul monıñ utnı bötenläy tuqtatu bulmawın assızıqladı. “Tuqtatıp toru bezneñ xärbilärneñ çigenüe digän süz tügel. Bez anda bulaçaqbız,”-dide ministr.

Çavuşoğlu bu 5 kön êçendä separatist terrorçı oyışma PKKnıñ Süriyädäge däwamçısı PYDneñ Törkiyä-Süriyä-Ğıyraq çigennän kitäçägen belderde.

Çavuşoğlu AQŞ ilbaşı kiñäşçese Mayk Pens citäkçelegendäge delegaśiyä belän uzğan söyläşüdän soñ matbuğat cıyılışı ütkärde. Ul PYD terrorçılarınıñ çigenüe, awır qorallarnıñ cıyıluı, xärbi noqtalar häm ambrazuralarnıñ yuq itelüe öçen kileşülären belderde.

Mäwlet Çavuşoğlu äytüençä, AQŞ belän Färat yılğasınıñ könçığışında DEAŞ belän köräş mäs’äläsendä dä koordinaśiyä häm xezmättäşlek turında süz bulğan.

Ministr Kobani mäs’äläsendä Törkiyäneñ bernindi garantiyä birmäwen assızıqladı.

“Maqsatıbız 32 çaqrım êçkä taba häm Färat yılğasınıñ könçığışınnan Ğıyraq çigenä qadär ber genä terrorçınıñ da qalmawı häm böten regionnıñ imin töbäk bularaq torğızıluı,”-di ul.  

İsegezgä töşeräbez, “Solıx çişmäse” xäräkäte 9nçı oktyabr’dä başlanğan ide. Ul Törkiyäneñ kön’yaq çigendä tözergä mataşqan terrorçı koridorın yuq itü, töbäkkä tınıçlıq häm xozur kiterü maqsatın quya.

İlbaşı Räcäp Tayyip Ärdoğan xäräkätneñ punktları xaqında başqala Änkarağa kilgän AQŞ ilbaşı kiñäşçese Mayk Pens belän başta küzgä-küz söyläşte, annan soñ şul uq temanı delegaśiyälärara cıyılışta qaradılar.  

Şunnan soñ Pens Törkiyäneñ “Solıx çişmäse” xäräkäteneñ 120 säğat’kä tuqtatılıp toraçağın belderde. Bu waqıt êçendä AQŞ YPGneñ Törkiyä çigenä yaqın imin töbäktän çigenüen täêmin itäçäk.  Pens, şulay uq, ike däwlätneñ DEAŞnı Süriyäneñ tön’yaq-könçığışında tulısınça yuq itelüe mäs’äläsendä ber fikerdä buluın assızıqladı.

Söyläşülär tögällänügä ük sośial’ mediada berençe belderüne AQŞ ilbaşı Tramp yasadı. Ul “Räxmät Ärdoğan” dip yazdı.