Ärdoğan ikele standartlar turında kisätte

Törkiyä ilbaşı Räcäp Tayyip Ärdoğan terrorçılıq häm êkstremist ağımnar belän köräştä ikele standartlarnıñ dön’ya külämendä däwam itüen söyläde. Ul AK partiyäneñ tradiśion ilçelär iftarında çığış yasadı.

Ärdoğan uzğan ike ayda dön’yanıñ här tarafta bulğan terrorçılıq höcümnärennän tetränüen xäterlätte. Anıñ äytüençä, êkstremizm, dähşät, ksenofobiyä häm terrorçılıq här cirdä çağılış taba. Yaña Zelandiyä häm Şri-Lankada bulğan höcümnär näfrätneñ barıp citkän noqtasın bigräk tä açıq kürsätä.

Ärdoğan Törkiyäneñ ozaq yıllar terrorçılıqtan zur qayğı-xäsrätlär kürgän, anıñ belän köräştä ähämiyätle täcribä tuplağan il buluın xäterlätte. Ul 15nçe martnı Xalıqara islamofobiyägä qarşı köräş köne bularaq qabul itü turında möräcäğat’ yasawların belderde häm anı barlıq däwlätlärneñ yaqlawın soradı.  

Ärdoğan, Törkiyäneñ tırışlıqlarına qaramastan, terrorçılıq belän köräştä ikele standartlarnıñ yäşäwen assızıqladı. “Separatist terrorçı oyışma PKK/YPGgä Awrupanıñ här tarafında tolerantlıq kürsätelä, xätta yärdäm itälär. Şulay uq, Fätxullaxçı terrorçı oyışması atamanı häm äğ’zaları AQŞta ber zinnätle utarda räxätlänep ğomer sörä. Terror aktların - terrorçılıq, bolarnı êşläwçelärne isä terrorçı dip atawdan qaçuçı däwlätlär bar,”-dip söyläde Törkiyä ilbaşı.