Törkiyä Mogeriniğa rizasızlıq belderde
Awrupa Berlege wäkile Törkiyäneñ Urta diñgezdäge êşçänlegen tänqıyt'lägän ide
Törkiyä Awrupa Berlege tışqı mönäsäbätlär häm iminlek säyäsäte yuğarı wäkile Federika Mogerininıñ Urta dingezdä uglevodorod êzläw êşçänlege belän bäyle belderüenä qarşı çıqtı. İlneñ tışqı êşlär ministrlığı älege ğamälneñ xalıqara xoquq nigezendäge qanunlı xaqlarğa tayanuın assızıqladı. Bu xaqtağı açıqlawda Törkiyäneñ regionda iñ ozın yar buyına iyä däwlät bularaq üz qıytğa mäydanında xoquq häm mänfäğat’lären yaqlayaçağı äytelä. Şulay uq, Tön’yaq Kipr Törek cömhüriyäteneñ dä Kipr utrawı tiräsendäge xaqların yaqlayaçağı belderelä.
Bu nisbättän Törkiyäneñ kiräkle här törle adımnı yasawdan bügengä qadär tartınmawı häm monnan soñ da tartınmayaçağına basım yasala. “Çınlıqta Urta diñgezneñ könçığışında iminlek häm totrıqlılıqnı cawapsız räweştä bozuçı, Kipr utrawınıñ urtaq xucası bulğan Kipr törekläreneñ tabiğıy baylıqlarğa töp xoquqların sanğa suqmawçı, xezmättäşlek täq’dimnären kire qağuçı häm, barlıq kisätülärgä qaramastan, ber’yaqlı êşçänlektän waz kiçmäwçe - Kipr grek idaräse”,-diyelä belderüdä.
Monnan tış, anda yıllar buyınça älege mäs’äläne çişü yünäleşendä ber adım da yasamawçılarnıñ bügen Törkiyägä süz äytergä bernindi xaqları bulmawı assızıqlana.
