İlbaşı TRT ğomum mödirenä şaltırattı
Ul “PKK” yaqlı törkemneñ “TRT WORLD” kanalına höcüme xaqında mäğ’lümat aldı häm mondıy waqıyğalarnıñ başqa qabatlanmawın teläde
Törkiyä ilbaşı Räcäp Tayyip Ärdoğan Törkiyä teleradiokompaniyäseneñ ingliz telendäge kanalı “TRT WORLD”nıñ Londondağı üzägenä höcüm uñayınnan TRT ğomum mödire İbrahim Ärängä telefonnan şaltırattı.
Ärdoğan “PKK” yaqlı törkemneñ “TRT WORLD” kanalına höcüme xaqında mäğ’lümat aldı häm mondıy waqıyğalarnıñ başqa qabatlanmawın teläde.
”PKK” yaqlı törkem “TRT WORLD”nıñ Angliya başqalası Londondağı üzägenä kiçä höcüm itte.
Terror oyışması atamanı Abdullah Öcalan posterları belӓn oyışmanıñ simvolı bulğan tuqıma kisӓklӓren kütӓrgӓn 50 keşelek törkem lobidӓ ber sӓgӓt’ tirӓse qaldı.
Annan soñ alarnı Angliya poliśiyäse binadan çığardı.
Waqıyğada TRT xezmätkärläre häm ofis zıyan kürmäde.
Terror oyışması tarafdarları Awrupada êlegräk tä töreklärneñ êş urınnarına häm mӓçetlӓrgӓ höcüm oyıştırğan, qayber çit il media oyışmaların basıp alğan ide.
“PKK” Angliyädä terror oyışmaları isemlegendӓ urın ala, lӓkin Angliya poliśiyäseneñ oyışma tarafdarlarına tolerantlık kürsӓtüe küzätelä.
Angliyädä terrorğa qarşı köräş qanunına kürä terror isemlegendäge oyışmanıñ simvolların kütärep yörü cinayät’ bulıp sanala.
Oyışma äğ’zaları 10 yılğa qadär törmägä utırtıla ala.
