Çavuşoğlunıñ belderüläre

Törkiyä tışqı êşlär ministrı Mäwlet Çavuşoğlu AQŞnıñ Süriyädän çigenüeneñ separatist terrorçı oyışma YPG/PKKğa xezmät itmäwe kiräklegen äytte. Ul berniçä oçraşu tormışqa aşıru öçen Tunisqa kitkän ide. Anda Çavuşoğlu Törkiyäneñ Färat yılğasınıñ könçığışındağı terrorçılarğa qarşı operaśiyä äzerlekläre häm AQŞnıñ Süriyädän çığu qararı belän bäyle çığış yasadı.

“AQŞnıñ Süriyädän çığu prośessın ul il belän koordinaśiyälibez. AQŞ belän här oçraq turında urtağa salıp söyläşäbez,”-dide ul.

Çavuşoğlu Vaşingtonnıñ qararınnan qanäğat’ buluların belderde. Ul Süriyädän çığunıñ YPGgä xezmät itmäyäçägen assızıqladı.

Ministr DEAŞ terrorçı oyışması belän köräş turında da äytep uzdı. “DEAŞ Süriyäneñ qaysı cirendä bulsa da - çistartaçaqbız. DEAŞ belän köräştä, terrorçılar tışında, härkem belän xezmättäşlek itä alırbız,”-dide ul.

 Çavuşoğlu 2nçe oktyabr’dä Soğud Ğaräbstanınıñ İstanbuldağı konsullığında wäxşilärçä üterelgän jurnalist Cämal Qaşıqçı cinayätenä dä tuqtaldı. Ul älege waqıyğanıñ mäxkämädä qaralırğa tiyeşlegen, ämma Soğud Ğaräbstanı belän ike arada problema tudırmawın assızıqladı.

Törkiyä ministrı Yämän krizisın söyläşü öçen isä İslam xezmättäşlek oyışmasınıñ êşçe törkemen 10nçı ğıynvarda İstanbulda cıyılırğa çaqıruların belderde.  

Çavuşoğlu sośial’ urtaqlaşu çeltäre Twitterdağı yazmasında: “Tunistağı FETO mäktäpläreneñ yabıluı häm Törkiyä mäğarif waqıfına birelüenä söyendek,”-dide.