Törkiyädä köymä tözeleşe

Törkiyä Böyek Millät Mäclese räise Binali Yıldırım Törkiyäneñ citeşterep üsäçäge turında söyläde. Ul Köymä tözüçelär palatasınıñ 64 yıllığı uñayınnan İstanbulda oyıştırılğan çarada qatnaştı.

Yıldırım köymä tözü tarmağınıñ yuğarı östämä bäyä kiterüen assızıqladı häm Törkiyäneñ infrastrukturada kütärelgän noqtasına basım yasadı.

Parlament räise Törkiyäneñ berniçä yıl êçendä hawa, qorı cir häm diñgez yulları şikelle üseş kriteriyları küzlegennän zur ara ütüen belderde. İl dön’yada 39nçı urınnan 2017nçe yıl axırına 9nçığa mende. Ul Törkiyäneñ soñğı çorlarda tözelgän avtomobil’ yulları, küperlär, aêroportlar, tizyöreşle poyezdlar häm tunnel’lär belän dan qazanuın da äytep uzdı.

Köymä tözü tarmağında da il zur alğa kiteş kürsätte. “Törkiyä, ayıruça, bilgele tip köymälärdä marka xälenä kilde. Yaxtalar, xezmät kürsätü köymäläre, buksir yasawda dön’ya külämendä köndäşlek itäçäk däräcägä citte,”-dide Yıldırım.

Çarada Binali Yıldırımğa küp yıllar êlek Köymä tözüçelär palatasına üz qulı belän yazğan kerü ğarizasın büläk ittelär.