Ärdoğannıñ Venesuêlağa säfäre

Törkiyä ilbaşı Räcäp Tayyip Ärdoğannıñ Venesuêlağa räsmi säfäre tögällände. Älege ildä ul berençe bulıp Simon Bolivar mavzoleyena bardı. Ärdoğannı anda Venesuêla däwlät başlığı urınbasarı Del’si Rodriges qarşı aldı. Alar mavzoley yanında bergäläşep xatirä räsemenä töşte. Soñınnan häykälgä çäçäklär quydılar. Venesuêla simfonik orkestrı ike däwlätneñ dä gimnın uynadı. Ärdoğan mavzoleynıñ xatirä däftärenä bolay dip yazdı: “Törkiyädän Venesuêlağa täwge ilbaşı säfären tormışqa aşıruıma bik şatmın. Latin Amerikasınıñ bäysezlek köräşe simvolı, Venesuêla xalqınıñ legendar yulbaşçısı Simon Bolivarnıñ mavzoleye yanında xörmät belän baş iyäm. Başqalabız Änkaranıñ iñ üzäk uramnarınnan bersendä iseme mäñgeläşterelgän Êl Libertador üzennän soñ qaldırğan alıştırğısız mirası belän Venesuêla häm Latin Amerikası ğına tügel, böten dön’ya külämendä bäysezlek utına yalqın östäwen däwam itäçäk.”

Ärdoğan soñınnan wazıyfadaşı Nikolas Maduro belän bergä Törkiyä-Venesuêla forumında qatnaştı. Törkiyä ilbaşı anda: “Sonğı aylarda iq’tisadi höcümgä duçar bulğan däwlät bularaq dön’yaküläm säwdä sistemasınıñ parametrların sanğa suqmawçı başbaştaqlıqlarnı xuplamıybız,”-dip söyläde.  

Ärdoğan 5nçe avgustta Nikolas Maduronı nişan itep alğan üterü kereşüe turında da äytep uzdı. “Venesuêlanıñ cäberlängän häm qıyırsıtılğannarğa köçle teläktäşlege qayberäwlärne borçuın beläm,”-dide ul.

Törkiyä ilbaşı Venesuêla belän iq’tisadi mönäsäbätlärneñ köçle potenśialı buluına basım yasadı. “Bu mömkinlekne iñ yaxşı räweştä qullanunı kiräk sanıym. “Sin dä qazan, min dä qazanıym” anlayışı belän xezmättäşlegebezne törleländerü häm här tarmaqta tiränäytü öçen tırışabız,”-dide ul.

Ärdoğan barı tik iq’tisadi tarmaqta tügel, töbäkne häm böten dön’yanı qızıqsındırğan mäs’älälrdä xezmättäşlek itäçäklären assızıqladı.

İke lider forumnan soñ urtaq matbuğat cıyılışı ütkärde. Anda Venesuêla däwlät başlığı Nikolas Maduro çığış yasap, bolay dide: “Bez, yäğ’ni bolivarçılar turında söyläşkändä, namuslı, zatlı, yärdämçel, êşçän häm bik êşçän dip äyterlär. Venesuêla xalqı qardäşlek öçen qoçağın açsa - anı çınlap ta açar häm bez qardäşlek öçen qoçağıbıznı böyek tarixıqa iyä, köräşçe, küp suğışlarda östen çıqqan, ciñüçe törek xalqına açarğa qarar qıldıq.”

soñınnan Törkiyä ilbaşı Räsäp Tayyip Ärdoğan häm Venesuêla däwlät başlığı Nikolas Maduro qatnaşında ike il arasında 10 tarmaqta kileşülär imzalandı.