Ğomerlek törmä dä az

Törkiyä milli küzläw oyışması ütkärgän operaśiyä näticäsendä Süriyädän kiterelgän şöbhäle Yusuf Nazikka 53 tapqır awırlaştırılğan ğomerlek törmä cäzası birelüen taläp itälär. Älege şäxes 2013nçe yılda Räyxanlıdağı şartlawnı oyıştıruda ğayeplänä. Anda 53 keşeneñ ğomere özelgän ide.

Utırış Änkara 9nçı awır cinayät’lär mäxkämäsendä uzdı. Anda höcümdä yaralanuçılar häm ülüçelärneñ tuğannarı qatnaştı.  Gayeplänüçeneñ advokatı qayber säbäplär arqasında utırışqa kilä almadı.

Höcümdä hälaq buluçılarnıñ tuğannarı Nazikneñ 5 yıldır nindi aqçağa yäşäwen häm Törkiyädän Süriyägä qaçarğa kemnär yärdäm itüen soradı. Ğayeplänüçe êlegräk söylägännären qabatladı.

Prokuror Yusuf Naziknı “däwlätneñ berlegen häm bötenlegen bozu”da häm 53 keşene “aldan uylap üterü”dä ğayepläde häm mäxkämädän 53 tapqır awırlaştırılğan ğomerlek törmä cäzası soradı. Monnan tış, yaqınça 130 keşene üterergä omtılu, röxsätsez räweştä şartlawçı matdä yörtü häm mölkätkä zarar birü şikelle ğayepläre dä bar.

Mäxkämä ğayeplänüçeneñ advokatı bulmaw säbäple utırışnı 2019nçı yılnıñ 14nçe fevralenä qadär kiçekterde.