Ärdoğan törek lirasına basım yasadı

İlbaşı Räcäp Tayyip Ärdoğan qayber törkemnärneñ dollar kursı yärdämendä iq’tisadta manipulyaśiyä yasarğa mataşularına iğ’tibarnı cälep itte. Ul Änkarada suğış invalidları köne tantanalarında qatnaştı. Andağı çığışında ilbaşı iq’tisadi mäs’älälärne alğı planğa çığardı. Ul, qayberäwlärneñ yalğış fiker tudırırğa tırışuına basım yasap, watandaşlarnı alarğa ışanmasqa çaqırdı. Ärdoğan äytüençä, Törkiyä iq’tisadı köçäyep alğa bara.  

İlbaşı valyuta belän êş itüçe alıp satu, arenda, küçemsez milek şirkätlärenä qağılışlı qararı turında da äytep uzdı. “Bu ildä monnan son dollar, yevro belän arenda yuq. Bu ildä törek lirası qullanıla. Bu - Törkiyä. Amerika Quşma Ştatları tügel. Törek lirası belän kibeteñne arendağa biräseñ, törek lirası belän satıp alasın,”-dip söyläde Ärdoğan.

İlbaşı Rusiyä belän yasalğan kileşü xaqında da äytep uzdı. “İdlibtä monnan soñ qan tügelmäsen didek. Küz yäş’läre tuqtasın. Monıñ öçen nişlärgä kiräk bulsa - êşlik. 12 matdä yazıldı, imzalar quyıldı. Bu çiklärebez tışındağı solıxqa adım. İnşallax, däwamı bulır,”-dide ul.  

Ärdoğan Törkiyäne poçmaqqa qısrıqlaw öçen atılğan här adımnıñ yaña işeklärneñ açıluına kiterdegene assızıqladı. “Ber işek yabılsa, Allah başqa cirdän yaña işeklärne açar. Onıtmağız, här tuu şikelle bu yana prośessnıñ da tulğağı bar. Här qotlı tuu awırtu belän kiler,”-dip söyläde üz çığışında ilbaşı.