"Terrorçı oyışmalardan ayırıp tormıyça tınıç xalıq, xatın-qız, balalarnı üterü keşeçä tügel"

Tışqı êşlär ministrı Mäwlet Çavuşoğlu İdlib mäs’äläsendä iñ täğayen häm aldan kürüçän säyäsätne Törkiyäneñ alıp baruına basım yasadı. Ul däwlätneñ Süriyädä tınıçlıq häm qan qoyusız çişeleş teläwen belderde.  Ministr Paqıstandağı saylawlardan soñ İslamadadqa barıp, andağı wazıyfadaşı Şax Mäxmüt Kuräyşi belän Süriyä mäs’äläse xaqında fiker alıştı.

Çavuşoğlu Törkiyäneñ qaynar noqtada çişeleşne tabu yulında bik küp tırışlıq quyuın söyläde. “Terrorçı oyışmalar belän köräş mäs’äläsendä härkem belän xezmättäşlekkä äzer bez, ämma bu säbäp belän ayırıp tormıyça tınıç xalıq, xatın-qız, balalarnı üterü keşeçä tügel, döres närsä tügel. Bu räweşle tınıçlıq häm bäxet kiterä almıybız,”-dide ul.

Ministr mäs’äläne çişü öçen düşämbe könne ilbaşı Räcäp Tayyip Ärdoğan belän Rusiyä däwlät başlığı Vladimir Putinnıñ oçraşaçağın belderde. Alar Soçi şähärendä İdlib xaqında söyläşü öçen cıyılaçaq.