BMOnıñ Ärdoğan belän Putinğa möräcäğate
"Şaltıratışığız häm bu qotoçqıç töş şikelle çornıñ tämamlanuına yärdäm itäçäk formulanı tabığız"
Berläşkän Millätlärneñ Süriyä maxsus wäkile Staffan de Mistura Törkiyä ilbaşı Räcäp Tayyip Ärdoğan belän Rusiyä liderı Vladimir Putinğa İdlib töbägendäge wäzğıyät’kä tiz arada çişeleş tabarğa quştı. Ul älege ike liderğa Jenevada jurnalistlar belän oçraşu waqıtında möräcäğat’ yasadı.
“Sez ber-beregez belän söyläşä torğan keşelär. Şaltıratışığız häm bu qotoçqıç töş şikelle çornıñ tämamlanuına yärdäm itäçäk formulanı tabığız. İkegez yasayaçaq telefon aşa söyläşü Tährandağı sammit aldınnan tağın da zur üzgäreşlärgä säbäp bulaçaq,”-dip söyläde wäkil.
Şul uq waqıtta, Berläşkän Millätlär ğomum särqatibe süzçese Stefan Duyarriç Süriyäneñ tön’yaq-könbatışındağı İdlib töbägendä Bäşşar Äsäd rejimı häm teläktäşläreneñ bulaçaq operaśiyäsenä qarşı “yuğarı afät” xälendä buluların söyläde. Ul köndälek matbuğat brifinğında töbäktäge wäzğıyät’kä bäyä birde.
Duyarriç beldergänçä, Rusiyäneñ kiçä İdlib häm Hamağa yasağan hawadan höcümnärendä ülüçelär häm yaralanuçılar, ayıruça, mäktäp häm kibet şikelle urınnarda küp.
“BMO İdlibtäge gumanitar wäzğıyät’neñ naçarayuı häm töbäktä xärbi kiyerenkelekneñ artuı näticäsendä bulırğa mömkin faciğalär öçen borçıluın tağın ber qat belderä,”-dide ul.
Duyarriç İdlibtä 3 millionğa yaqın grajdanlınıñ yäşäwenä häm BMO yärdämnäreneñ töbäkkä Törkiyä arqılı citkerelüenä basım yasadı. Ul Süriyäneñ tön’yaq-könbatışında xärbi operaśiyä bulsa, tuaçaq ixtıyaclar öçen 311 million dollar tiräse fond kiräklegen äytte.
Staffan de Mistura isä Törkiyä, Rusiyä häm İran delegaśiyäläre belän 10-11nçe sentyabr’lärdä Jenevada bulaçaq oçraşularnı da telgä aldı. Ul bu äñgämälärneñ Süriyädäge säyäsi prośessnıñ yazmışın xäl itäçägen farazlıy.
