Törkiyä watandaşlarına viza uñaylığı

Rusiyä tışqı êşlär ministrlığı süzçese Mariya Zaxarova Törkiyä watandaşlarına viza alunı ciñeläytü belän bäyle söyläşülärneñ közen başlanacağın belderde. İke tarafnıñ da tışqı êşlär ministrlıqları bu mäs’älädä kileşte inde. Zaxarova äytkänçä, viza mäs’äläsendä fiker alışu öçen iñ uñaylı cirlek - konsullıq belgeçläreneñ ikeyaqlı oçraşuları. Alarnı közgä planlaştıralar.   

Küptän tügel Rusiyä tışqı êşlär ministrı Sergey Lavrov törek xezmättäşe Mäwlet Çavuşoğlu belän Mäskäwdä küreşkännän soñ: “Törkiyä watandaşlarına qarata viza programmasında yasalaçaq uñaylıqlar öçen urtaq söyläşülär mexanizmı tözüdä kileştek. Cäyge yal çorı betkännän soñ belgeçlärgä kürsätmälär bireläçäk. Qısqa waqıt êçendä bu mäs’älä belän bäyle xäbärlär häm söyençe alaçaqsız,”-digän ide.