“Törkiyägä berkem dä ämer birä almıy”

Törkiyä Amerika idaräseneñ Fätxullaxçı terror oyışması belän mönäsäbätlärdä şöbhälänep kiçä öy sağına alınğan ruxani Êndryu Bransonnı irekkä çığaru taläbenä kisken cawap birde. AQŞ ilbaşı Donal’d Tramp NATO äğ’zası Törkiyäneñ mäxkämäsenä tıqşınu belän bäyle süzlär äytkän ide. Törkiyä tışqı êşlär ministrlığı moña qarşı: “Törkiyägä berkem dä ämer birä häm yanıy almayaçaq,”-digän belderü yasadı. Anda AQŞ idaräsen tiz arada bu yalğış söyläşüne ber çitkä quyıp konstruktiv äñgämä qısalarına kire qaytırğa çaqırdılar.

Tışqı êşlär ministrı Mäwlet Çavuşoğlu berkemneñ dä Törkiyägä närsä êşläyäçägen äytep tora almayacağın assızıqşadı. Ul Twitterda yazğan belderüendä yanawlarnı sabırlıq belän tıñlap tormayaçaqların äytte.  

 AQŞ ilbaşı Donal’d Tramp sośial’ çeltär aşa: “Ruxani Branson irekkä cibärelmäsä, AQŞ sankśiyälär kertäçäk,”-dip yanadı.  

Annan alda viśe-prezident Mayk Pens tä Bransonnı AQŞqa qaytaru öçen êşçänlekne däwam itäçäklären, ägär barıp çıqmasa, Törkiyägä sankśiyälär kertäçäklären äytte.

Räsmi çığanaqlarğa qarağanda, şunnan soñ  Mäwlet Çavuşoğlu AQŞ däwlät särqaribe Mayk Pompeo belän telefon aşa söyläşte. Anıñ eçtälege turında mäğ’lümat birelmäde.