“Törkiyä – Rusiyä – İran öçyaqlı sammitı” tögällände

Süriyä mäs’äläsen kütärgän “Törkiyä – Rusiyä – İran öçyaqlı sammitı”nıñ ikençese başqala Änkarada tögällände. Çara ilbaşı Räcäp Tayyip Ärdoğan citäkçelegendä Rusiyä Federaśiyäse däwlät başlığı Vladimir Putin häm İran ilbaşı Xäsän Ruxani qatnaşında jurnalistlar öçen yabıq işeklär artında ütte. Soñınnan 3 lider urtaq matbuğat konferenśiyäsendä çığış yasadı.

“Bügen aldağı çornı yaqtırtaçağına ışanıp kinäşläştek häm kiläçäk adımnarıbıznı bilgelädek”,-dide Ärdoğan. Ul Süriyädä kiyerenkelekne kimetüdä Törkiyäneñ cawaplılıqların tırışıp cirenä citkerüenä basım yasıy. Bu mäs’älädäge qararlılığın İdlibtäge 8nçe küzätü noqtası tözeleşe belän kürsätüenä iğ’tibarnı yünältte.

Ärdoğan Süriyäneñ cir bötenlegen saqlaw – barlıq terror oyışmalarınıñ ber ük distanśiyädä buluına bäyle ikänen, häm monıñ böten dön’ya cämäğat’çelege tarafınnan qabul itelüe kiräklegen söyläde. Ul äytkançä, Törkiyä DEAŞqa kisken qarşılıq kürsätte häm şunı uq başqa ber terrorçı oyışma  - YPG/PYD belän köräşü öçen başlanğan “Zäytün Botağı” xäräkätendä dä qabatladı. “Bez barı tik iminlek urnaştırıp qına qalmıybız, kontrol’gä alınğan cirlärne anıñ xucaları – süriyäle qardäşlärebez yäşi alırlıq xälgä kiteräbez”,-dide Ärdoğan. Ul, Münbiçne dä kertep,  PYD/YPG kontrolendäge cirlärne imin xälgä kitergänçe tuqtamayaçaqların belderä. Täl Rifat töbäge öçen Rusiyä häm İran belän bergä urtaq êşçänlek xäzerlängän. Ärdoğan Süriyäneñ cir bötenlegen täêmin itü häm bäreleşlärne tuqtatıp yañadan tözü öçen anlayış berdämlegendä buluların alğa sörä. “Garantiyä birüçe däwlätlär bularaq tozaqlarğa, kiştälärgä, provokaśiyälärgä iğ’tibar itmiçä kileşengän maqsatlarğa taba qararlı şäkeldä yöriyäçäkbez. Xalıqara cämäğat’çelekne Süriyä mäs’äläsen säyäsi çişü öçen quyğan tırışlıqlarğa yärdäm itärgä çaqırabız”, - dide Törkiyä ilbaşı.

İran liderı Ruxani da Süriyädäge 4 töbäktä “utnı tuqtatu”nıñ ğamälgä aşuı häm krizisnıñ kimüe mäs’äläsendä Törkiyä, İran häm Rusiyäneñ möhim rol’ uynawın belderde. Anıñ fikerençä, bügen süriyälelärneñ ömete kiçägedän kübräk häm solıx fikere tağın da yaqınraq. “Tınıçlıq urnaştırunı barıbıznıñ bergä çişeleş yulı bularaq qabul itüebez kiräk. Bez, ayıruça, Süriyäneñ cir bötenlege häm milli suverenlığınıñ, bäysezlegeneñ här keşe tarafınnan iğ’tibarğa alınuın maqsat itep quyabız. Ber däwlätneñ dä Süriyäneñ kiläçäge öçen qarar birü xaqı yuq. Süriyälelär üz saylawların häm konstituśiyälären xäzerläyäçäk”,-di Ruxani.

Rusiyä ilbaşı Vladimir Putin 3 ilneñ urtaq qararınıñ Süriyäneñ suverenlığın häm cir bötenlegen saqlaw tarafında buluın söyläde. Ul DEAŞnıñ nigez köçläreneñ ciñelüen häm başqa terrorçı oyışmalarnıñ da xärbi köçläre zarar kürüen belderde. “Maqsatıbız terrorçılıqnı bötenläy yuq itü”,-di Putin. Ul, Törkiyä, İran häm Rusiyä tışında, Süriyä mäs’äläsendä berkemneñ adım atmawın telgä aldı. “BMO yärdäm itä, ämma bu citarlek tügel. Süriyäneñ askı häm öske qorılışına barlıq illär hiçşiksez öleş kertergä tiyeş”, - dide Putin.