"Törkiyägä yanawçılar yuqqa çığaçaq"

Törkiyä ilbaşı Ärdoğan Amerika Quşma Ştatları terror armiyasen barlıqqa kilgänçe ük buaçaqların äytte.

Änkaranıñ Kahramankazan ilçäsendä êlektr êşxanäseneñ açılışında çığış yasağan Ärdoğan AQŞnıñ Süriyäneñ tönyağında 30 meñ keşelek çik buyı köçe barlıqqa kiteräçäge açıqlawına tuqtaldı.

Terror köçeneñ Törkiyägä yanawın assızıqlağan ilbaşı separatist PKK terror oyışmasınıñ Süriyädäge törkeme PYD/YPG kontrolendä bulğan terror töbäklärenä ixtimallı operaśiyağa işarät itep, Afrin häm Münbiçkä här mizgeldä operaśiyaneñ başlana alacağın äytte.

Üsep kilüçe Törkiyäneñ qayber dairälärne tınıçsız itüen häm bu dairälärneñ däwamlı Törkiyägä qarşı êşkä kereşergä tırışuların citkergän Ärdoğan: “AQŞnıñ yärdämen kürüçe PKK/PYD bezgä yanıy. Qararıbıznı birdek, sezne yuqqa çığaraçaqbız. Gaubiśalar belän ut açabız, açarğa däwam itäçäkbez. Nindi tozaq quysalar da, 2023 yılğı maqsatlarıbızğa kirtä quya almayaçaqlar,” – dide.

AQŞnı terror oyışmasına yärdäm kürsätüdän waz kiçärgä çaqırğan ilbaşı tübändägeçä däwam itte: “30 meñ keşelek qorğan armiya sine wäkillek itmäyäçäk häm strategik partnyerıñ aldında oyatqa qalaçaqsıñ. Bez barlıq berlektäşlärebezgä şunı äytäbez: arabızda terrorçılar bulmasın. Terror oyışması bayraqların sez üzegez töşeregez, yuğisä bez alarnı töşerep, sezneñ qulğa tapşırırbız. Terrorçılar belän bergä buluçılarnı yuqqa çığarırğa mäcbür itmägez.”

Törkiyäneñ çige buyınça terror armiyase qoruda üzeneken itüçe AQŞnıñ Törkiyäne maqsat itep aluın beldergän Ärdoğan Afrin häm Münbiçneñ qısqa waqıtta terrorçılıqtan çistartılaçağın, soñınnan çiratnıñ qalğan töbäklärgä citäçägen äytte.