Ӓrdoğan - Putin söyläşüe

Törkiyӓ ilbaşı Ӓrdoğan hӓm Rusiyӓ dӓwlӓt başlığı Vladimir Putin yılnıň 8nçe söylӓşüe öçen başqala Ӓnkarada oçraştı.

İke lider yaqınça 1 sӓğat’ barğan üzara söylӓşüdӓn soň matbuğat oçraşuı oyıştırdı.

Berençe açıqlawnı yasağan Ӓrdoğan Putinnı tağın ber tapqır qunaq itüdӓn şat buluın ӓytte.

Törkiyӓ-Rusiyӓ mönӓsӓbӓtlӓreneň hӓr ölkӓdӓ üsep, dӓwam itüenӓ işarӓt itkӓn ilbaşı sӓyӓsi garmoniyaneň sӓwdӓ, turistik hӓm ênergetika mönӓsӓbӓtlӓrenӓ dӓ çağıluın assızıqladı.

Rusiyӓ belӓn sӓwdӓ külӓmeneň yılnıň berençe 10 ayında 30% tirӓse artış tӓêmin itüen beldergӓn Ӓrdoğan Aqqoyı atom-töş stanŝiyase hӓm başqa urtaq ênergetika proyektlarınıň qısqa waqıtta çınğa aşırıluınıň ӓhӓmiyӓtenӓ qağıldı.

Putin belӓn regional’ problemalarnı da qarawların açıqlağan Ӓrdoğan Amerika Quşma Ştatları ilbaşı Donal’d Trampnıň Yerusalimne İzrail başqalası itep iğlan itü qararınıň bar dönyada reakŝiya uyatuın belderep, möselman, xristiyan hӓm aqıllı yӓhüdlӓrneň dӓ xıyalların çelpӓramӓ kiterüen belderde.

Qunaq dӓwlӓt başlığı belӓn Süriyӓdӓge wazğiyӓtne dӓ qarawların aňlatqan Ӓrdoğan Astana barışı garantları bularaq Rusiyӓneň Soçi şӓhӓrendӓ oyıştırılaçaq yaňa oçraşuğa işarӓt itte.

Putin isӓ Süriyӓ mӓs’ӓlӓsendӓ Törkiyӓ belӓn tığız xezmӓttӓşlekneň dӓwam itüenӓ işarӓt itep, bu il cirlӓreneň zur öleşeneň terrorçılardan çistartıluın açıqladı.

Süriyӓdӓ çişeleş öçen Ӓrdoğannıň tırışlıqların tӓqdir itüen beldergӓn Putin Yerusalim mӓs’ӓlӓsendӓ isӓ AQŞ citӓkçelegen tınıçlıq urnaştıru barışına zıyan saluçı qarar qabul itü belӓn tӓnqitlӓde.