“Xäl itüebez zarur şaqtıy mäs’älä bar”
Amerika Quşma Ştatları başqalası Waşingtonda oçraşularına başlağan Premyer-ministr Binali Yıldırım “Cömhüriyätçelär”neñ äydäp baruçı zatlardan Tennessi senatorı Bob Korker belän küreşep söyläşte.
Yıldırımnıñ ber ük waqıtta AQŞ Senatınıñ tışqı mönäsäbätlär komitetı räise wazıyfasın da başqaruçı Korker belän oçraşuında Tışqı êşlär ministrı Mäwlüt Çavuşoğlu, Ênergetika häm tabiği çığanaqlar ministrı Bärat Albayraq, Törkiyäneñ Waşington tulı wäqalätle ilçese Serdar Qılıç, Ministrlar Kabinetınıñ tışqı säyäsät baş kiñäşçese Kärim Uras häm Ministrlar Kabinetı kiñäşçese İhsan Durdu qatnaştı.
“Cömhüriyätçe” partiyasınıñ möhim zatlarınnan berse bulğan Korker oçraşudan soñ “Anadolu” agentlığı xäbärçesenä yasağan belderüendä premyer-ministr Yıldırım belän küreşep söyläşüdän qanäğät buluın äytte.
Bik samimi, êçkersez häm yaxşı söyläşü buluın assızıqlawçı Korker: "İke il arasındağı kiñ qırlı häm qayber üzençälekle, speśifik mäs’älälärne söyläştek. Xäl itüebez zarur şaqtıy mäs’älä bar. İke il arasındağı problemalarnıñ çişeleşe waqıt alaçaq. Törkiyä bik güzäl il häm soñğı yıllarda şaqtıy alğarışnı tormışqa aşırdı. Törkiyägä moñarçı säfär yasağan idem häm bu ilne bik yaratam. Törkiyä bigräk tä Süriyä qaçaqları öçen küp närsä yasadı. NATO kebek êlemtälärebez bar, ämma xäzerge waqıtta ayırmalı qılğan mäs’älälär dä bar”, - dip belderde.
