Törkiyä matäm tota

Kilep töşkän boralaqta 1 general-leytenant, 2 polkovnik, 1 podpolkovnik, 1 mayor, 3 kapitan, 1 ölkän leytenant, 2 baş serjant, 2 serjant bar ide.

Uludärä ilçäsenä bäyle Şänoba cirlegennän xäräkät itkän “Cougar” törendäge boralaq kütärelgännän soñ 3 minut uzğaç yuğarı vol’tlı êlektr liniyasına tağılıp kilep töşte.

Şähitlär arasında 23nçe çik buyı diviziyası komandirı general-leytenant Aydoğan Aydın da bar.

Törkiyäneñ berençe xatın-qız ilçä (rayon) jandarmeriyäse komandirı podpolkovnik Songül Yakut ta boralaq qazasında şähit buldı.

Aydın citäkçelegendä töbäktä 43 kön buyı separatist terror oyışmasına qarşı zur külämdä zıyan kiterelgän küp sanda kiñ qırlı operaśiya başqarğan ide.

Şırnak däwlät xastaxanäsenä salınğan şähitlär öçen Şırnakta cıyın oyıştırıldı. Mäyetlär mämläkätlärenä ozatıldı.

Ğomum ştab citäkçelege: “Waqiğa (waqıyğa) belän bäyle tikşerü däwam itä”, - dip belderü yasadı.

Qaza xäbärennän soñ Prem'yer-ministr urınbasarı Mäxmät Şimşäk, Êçke êşlär ministrı Söläyman Soylu, Milli saqlanu ministrı Fikri Işık häm Ğomum ştab başlığı armiya generalı Hulusi Akar xärbi boralaq kilep töşkännän soñ Şırnaqqa kitte.

İlbaşı Räcäp Tayyip Ärdoğan isä, yazma belderü yasap, şähit xärbilärgä Allahtan yarlıqaw soradı.

Törkiyä Däwlät başlığı: "Terrorçılıq belän köräştä soñğı aylarda bik zur uñışqa ireşüebezne täêmin itkän bu ğaskärilärebezneñ batırlığın, qaharmanlıqların il häm millät bularaq hiç onıtmayaçaqbız”, - dip äytte.

Qayğılı xäbärne borçılıp işetüen assızıqlawçı Prem'yer-ministr Binali Yıldırım da: "Bezne tirän qayğığa êtärgän bu dähşätle waqiğada (waqıyğada) şähit bulğan qaharman watan balalarına Allahtan yarlıqaw sorıybız”, - dip äytte.

“Cömhüriyät xalıq” partiyası (CHP) Ğomum başlığı Kemal Qılıçdaroğlu Şırnakta xärbi boralaqnıñ kilep töşüe näticäsendä şähit bulğan ğaskärilärgä Allahtan yarlıqaw teläde.

Şırnakta kilep töşkän xärbi boralaqnıñ qaldıqları (videoyazma)