Terrorçı gäyeben qabul itte

Yaña yıl tönendä İstanbulda tönge klubta oyıştırılğan höcümdä 39 keşeneñ ülemenä säbäp bulğan Abdülgadir Maşaripov İstanbulnıñ Äsänyurt bistäsendä “DEAŞ” terror oyışmasınıñ ştab-kvartirasına oyıştırılğan operaśiya waqıtında totqarlandı.

İlbaşı Ärdoğan tönge klub höcümçesen totqarlağan iminlek häm küzläw törkemnären täbrik itte.

“Aq” partiya ğomum başlığı häm Premyer-ministr Binali Yıldırım da partiyasınıñ Üzäk başqarma şurası cıyılışı aldınnan jurnalistlarğa yasağan belderüendä höcümne oyıştırğan terrorçıdan soraw alunıñ däwam itüen häm şaqtıy täfsilli mäğlümatkä ireşelüen äytte.

Yıldırım: "Möhim bulğanı – yasalğan şuşı cirängeç höcümne başqaruçınıñ totqarlanğan buluı, monıñ artındağı iradäneñ, köçlärneñ, kemneñ buluınıñ bilgelänelüe. Bu bezneñ öçen möhim ber täräqqiyät”, - dip basım yasadı.

İstanbul vilayät başlığı Vasip Şahin da İminlek mödire Mostafa Çalışkan belän bergä oyıştırğan matbuğat oçraşuında tönge klubqa yasağan höcümdä 39 keşeneñ ğomeren özgän Abdülgadir Maşaripovnıñ gäyeben qabul itüen, ütkärelgän tikşerüdä dä barmaq êzeneñ turı kilüen äytte.

İminlek köçläreneñ bik citdi êşçänlek alıp barıp, cirängeç höcümneñ qatilen häm başqaruçısın Äsänyurtta totqarlawın belderüçe gubernator üterüçeneñ 1983nçe yılda Üzbäkstanda tuğan, Äfğanstanda öyrätelgän, 4 tel belgän, uqığan terrorçı buluın citkerde.

Terrorçı belän bergä Ğiraqtan ber ir keşeneñ häm törle illärdän 3 xatın-qıznıñ da qulğa alınuın äytüçe Şahin alarnıñ da oyışma bäyläneşeneñ bik yuğarı buluın, çönki ber öydä bergä qaluın assızıqladı.

Vilayät başlığı operaśiya waqıtında terrorçı belän bergä 197 meñ amerikan dolları, ike pistolet häm küp sanda materialnıñ da qulğa töşerelüen belderde.

Vilayät başlığı Şahin höcümneñ “DEAŞ” terror oyışması isemennän yasaluınıñ anıq räweştä bilgele buluın äytte.

Şahin qatilneñ Törkiyägä 2016nçı yılnıñ ğinwar ayında kilüeneñ isäplänelüen belderde.

Höcümçeneñ tabıluı öçen poliśiyanıñ bik iğtibarlı êşçänlek alıp baruın häm 152 adresta operaśiya oyıştırıluın assızıqlawçı Şahin operaśiyalar waqıtında 50 keşeneñ qulğa alınuın, bolardan ikeseneñ saq astına alınuın äytte.

İminlek xezmätkärlärenä häm bäyläneşle keşelärgä räxmätlären citkerüçe gubernator Şahin İstanbulda mondıy waqiğanıñ qabatlanmawın teläwen belderde.