Törkiyä – Rusiyä urtaq fondı

Törkiyä – Rusiyä mönäsäbätläreneñ tizlek belän cayğa salınuına qarağan möhim kileşü täêmin itelde.

Urtaq investiśiya fondınıñ qorıluı mäs’äläsendäge urtaq belderge 2 ilneñ iqtisad ministrları tarafınnan İstanbulda imzalandı.

Törkiyä iqtisad ministrı Nihat Zäybäkçi Rusiyäneñ iqtisadi üseş ministrı Aleksey Ulyukaev belän İstanbulda küreşte. Bu soñğı 3 ayda 4nçe söyläşü buldı.

Zäybäkçi Törkiyä häm Rusiyä arasındağı barlıq säwdä mäs’äläläre qaralğan Qatnaş iqtisad komissiyaseneñ dä qabat êşçänlek kürsätä başlawın äytte.

Törkiyä belän Rusiyä arasında urtaq investiśiya fondınıñ qorıluı qararına tuqtalğan Zäybäkçi: “Rusiyäneñ investiśiya fondı belän bergä Törkiyä fondı, Törkiyä häm Awrupa investiśiya fondı bergä êşçänlek başqaraçaq. Berençe êtapta 1 milliard dolarlık kapital salınaçaq. Soñınnan ixtıyac toyılğanda tağın da kübräk bulaçaq. Bu adımnar tarixi ähämiyätkä iyä,” – dide.

Zäybäkçi Törkiyädän yäşelçä häm ciläk-cimeş importına quyılğan kirtälärneñ dä qısqa waqıtta betäçägen ömet itülären äytte.

Rusiyäneñ iqtisadi üseş ministrı Aleksey Ulyukaev isä urtaq fondnıñ êş dairälarenä zur forsat buluın citkerde.

Ulyukaev: “Säwdä ölkäsendäge mönäsäbätlärneñ qabat telängän däräcägä citüe öçen başqarıluı zarur bulğannar mäs’äläsendä möhim kileşügä qul quydıq. Xezmät tarmağı, investiśiya, transport, turizm; bolar belän bäyle ütkärelgän soñğı söyläşülär ütä kürenmäle häm êçkersez uzdı. Ayıruça urtaq investiśiya fondınıñ êş dairälärenä zur forsatlar alıp kiläçägen uylıym", - dip äytte.