Ärdoğan Törkiyägä qayttı

Törkiyä ilbaşı Räcäp Tayyip Ärdoğan Qıtaynıñ Hangco şähärendä G20 Liderları oçraşuı qısalarındağı söyläşülären tämamlap, Törkiyägä qayttı.

Ärdoğan Änkaradağı Äsänboğa hawa mäydanında êçke êşlär ministrı Söläyman Soylu, Änkara vilayät idaräse başlığı Mäxmät Kılıçlar, Änkara İminlek mödire Mäxmüt Karaaslan belän qalğan räsmi zatlar tarafınnan qarşı alındı.

Törkiyä ilbaşı belän xäläl cefete Äminä Ärdoğan, premyer-ministr urınbasarı Mäxmät Şimşäk, tışqı êşlär ministrı Mäwlüt Çavuşoğlu, iqtisad ministrı Nihat Zäybäkçi, ênergetika häm tabiği çığanaqlar ministrı Bärat Albayrak, Milli küzläw oyışması kiñäşçese Hakan Fidan da Törkiyägä kilde.

Ärdoğan Qıtay xalıq cömhüriyätennän kitkänçe matbuğat oçraşuı oyıştırdı.

Matbuğat oçraşuında Süriyädä imin töbäkneñ barlıqqa kiterelüe variantın monnan alda küp tapqır täqdim itüen beldergän Ärdoğan bernindi ilneñ bu mäs’älädä tögäl adım yasamawın citkerde.

Qaçaqlar probleması mäs’äläsendä imtixannan uzılmawın assızıqlağan Törkiyä ilbaşı 3 million süriyäle häm ğiraqlını qabul itkän Törkiyäneñ bu ölkädä ictimaği oyışmaları belän bergä 25 milliard dollardan artıq aqça sarıf itüen añlattı.

Terrorçılıqnıñ isä yaña räweşlärgä kerep, bar dönyağa yanawın açıqlağan Ärdoğan Törkiyädä 15nçe iyul’ könne barlıqqa kilgän tüntäreleş kereşüen dä Törek qorallı köçläre eçendä ütep kergän törkemneñ başqaruın, terrorçılıqnıñ yaña räweşe buluın assızıqladı.

Ul tönne televideniye kanallarınnan möräcäğat itep, mäydannarğa çaqırğan xalıqnıñ terrorçılar qulındağı F-16 xärbi oçqıçlar häm tanklardan qurıqmıyça bu çaqıruğa cawap qaytaruın añlatqan ilbaşı monıñ demokratiya köräşe buluın belderde.

Ärdoğan Fätullahçı terror oyışmasınıñ 170 ildä tağın da aktiv buluın citkerep: “Barlıq bu illärne iskärtäm, sizgerle bulırğa çaqıram. Şul uq fäläkät sezdä dä barlıqqa kilä ala,” – dide.

“DEAŞ”, PKK, PYD, YPGğa ayırıp qarawçı añlayışnı beterü zarurlığına basım yasağan Törkiyä ilbaşı: “Terrorçınıñ yaxşısı, naçarı yuqtır. Bolarğa ayırıp qaralsa, bumerang kebek äylänep ilgä qaytır,” – dide.

Bu oyışmalar belän köräştä Törkiyäneñ täwäkkällelegenä işarät itkän Ärdoğan Süriyädä 24nçe avgust könne başlanğan Färat qalqanı operaśiyaseneñ maqsatınıñ da bu buluın, Süriyäneñ cir bötenlegenä qatışu turında süzneñ barmawına basım yasadı.

Törkiyä bularaq dön’yaküläm säwdädäge üseşneñ nığıtıluınıñ ähämiyäten dä alğı planğa çığaruların añlatqan ilbaşı bu ölkädäge torğınlıqnı beterüneñ şart buluın äytte.

Ärdoğan sammit buyınça 3-4-5nçe sentyabr’ könnärendä ütkärgän ike yaqlı häm wäkilleklärara söyläşülären dä xäterlätep, barısınıñ da uñay atmosferada uzuın citkerde.

Törkiyä ilbaşı Ärdoğan Qıtayda G20 sammitında äğza illärneñ liderlarına törekçä häm inglizçä äzerlängän “G20 Antaliya oçraşuı” kitabın büläk itte.

Çit il liderlarına büläk itelgän 360 bitlek maxsus kitapta sammit beldergeläre belän ber rättän qatnaşuçı illär häm Antaliya xaqında mäğlümat häm fotoräsemnär urın ala.

Ärdoğan Qıtayda küreşep söyläşkän çit il liderlarğa ayıruça Fätullahçı terror oyışması/parallel’ däwlät qorılışınıñ 15nçe iyul’ könge tüntäreleş kereşüe häm oyışma xaqında mäğlümat häm räsemnär urın alğan paket ta birde.

Fätullahçı terror oyışması/parallel’ däwlät qorılışınıñ 15nçe iyul’ könge tüntäreleş kereşüe belän bäyle barış xaqında äzerlängän paketta tüntäreleşçelär başqarğan cinayätlärne kürsätep toruçı fotoräsem häm video yazmalar, xronologiya häm añlatmalar bar.