Mäskäw belän elemtä qorıldı

24nçe noyabr könge Törkiyä-Rusiyä oçqıç krizisınnan soñ Mäskäw belän berençe elemtä qorıldı.

Törkiyäneñ Azıq-tölek, igençelek häm terlekçelek ministrlığı wäkillege törek awıl xucalığı eşlänmäläreneñ keşe sälamätlegenä qağılışlı tikşerenü häm qayber texnik analizlarnı söyläşü maqsatı belän Mäskäwgä kitte.

4 keşelek wäkillek düşämbe könne başqala Mäskäwgä barıp citte.

Wäkillekneñ sişämbe könne “Rosselhoznadzor” räsmi zatları belän ayıruça Rusiyä tarafınnan çikläw qullanılmağan törek awıl xucalığı eşlänmäläreneñ taläp itelgän kriteriylarğa ahäñe mäs’äläsen qarawı kötelä.

Rosselhoznadzor başlıq urınbasarı Aleksey Alekseenko törek wäkilläreneñ kiläse atnada Törkiyädän yäşelçä häm ciläk-cimeşlärneñ Rusiyägä cibärelüen söyläşer öçen Mäskäwgä baraçağın citkergän ide.

Alekseenko xäbär agentlığı “Ria Novosti”ğa yasağan açıqlawlarda: “Töreklärne monda çaqırdıq, alar da bu säfärne qabul itte. Söyläşülär kiläse atnada Mäskäwdä çınğa aşaçaq. Söyläşülärdä laboratoriyadäge kontrollär belän ber rättän yäşelçä häm ciläk-cimeşlärne imin räweştä cibärü qaralaçaq,” – digän ide.

2015nçe yılnıñ 24nçe noyabr könne törek hawa kiñlegen bozğan Rusiyä xärbi oçqıçınıñ bärep töşerelüennän soñ Törkiyä häm Rusiyä arasında kiyerenkelek barlıqqa kilgän ide.