“Soğud Ğaräbstanı räsmiläre Qaşıqçını kem üterüen açıqlarğa tiyeş”

İlbaşı, “Ğadälat häm qalqınu” partiyäse ğomum başlığı Ärdoğan partiyäseneñ kiñäytelgän cıyılışında yasağan çığışında Soğud Ğaräbstanınıñ İstanbuldağı konsullığında êşlängän Cämal Qaşıqçı cinayätenä dä tuqtaldı.

Ärdoğan:”Jurnalist räsmi êşlär öçen konsullıqqa kilde häm annan çıqmadı.Üterelde didegez,mäyete qayda ?Soğud Ğaräbstanı waqıyğa belän bäyle 18 keşeneñ saq astına alınuın belderde. Bu 18 keşe Qaşıqçını kem üterüen belä. Üterü boyırığın kem birde? Bu keşelär Törkiyägä kemneñ boyırığı belän kilde? Bolarnı açıqlawları zarur. Soğud Ğaräbstanı yäkşämbe könne baş prokurorın Törkiyägä cibära. İstanbulda baş prokurorıbız belän küreşäçäklär. Qaşıqçını kemnär üterüen Soğud Ğaräbstanı räsmiläre açıqlayaçaq. Böten närsäne bu 18 keşe belä. Alarnı söyläşterä almıysız ikän bezgä tapşırığız. Waqıyğa İstanbulda buldı. Alarnı bez xökemgä tartıyq”,-dide.

Soğud Ğaräbstanı jurnalistı Cämal Qaşıqçı 2 nçe oktyabr’dä räsmi êşlär öçen Soğud Ğaräbstanınıñ İstanbuldağı baş konsullığına kilgännän soñ yuğalğan ide.

Soğud Ğaräbstanı citäkçelege 20 nçe oktyabr’dä yasağan belderüendä  Qaşıqçınıñ konsullıq binasında kilep çıqqan tawış-ğawğa näticäsendä ülüen açıqladı.