İran sammitınıñ urını üzgärde

İrannıñ Könçığış Azärbaycan märkäze Täbriz şähärendä bulırğa tiyeşle öçyaqlı oçraşu başqa urınğa küçerelde. Törkiyä - İran - Rusiyä liderlar sammitı başqala Tähranda 7nçe sentyabr’dä uzaçaq. Oçraşuda ilbaşı Räcäp Tayyip Ärdoğan, İran däwlät başlığı Xäsän Ruxani häm Rusiyä prezidentı Vladimir Putin qatnaşa.

Sammitta Süriyäneñ kiläçäge häm İdlibtäge üzgäreşlär kön üzägendä bulaçaq. Öç lider moña qadär Süriyä mäs’äläsen qaraw öçen Rusiyäneñ Soçi şähärendä häm Änkarada oçraşqan ide.

Tährandağı sammittan soñ 11nçe-12nçe sentyabr’ könnärendä Jenevada BMOnıñ Süriyä maxsus wäkile Staffan de Mistura citäkçelegendä “Süriyä konstituśiyäse komitetı cıyılışı” uzaçaq. De Mistura Törkiyä, İran häm Rusiyäne şäxsän çaqırdı.