Awrupa Berlege Qazaqstan belän êlemtälärne arttırırğa teli
Awrupa Berlege tışqı mönäsäbätlär häm iminlek säyäsäte yuğarı wäkile Josep Borrel’ Urta Aziyädäge iñ zur säwdä häm kapital urtaqları Qazaqstan belän mönäsäbätlärne arttırırğa häm nığıtırğa teläwlären äytte
Borrel’ Qazaqstan başqalası Astanada räsmi oçraşular ütkärde.
Tışqı êşlär ministrı Muhtar Tiläubärdi belän wäkilleklärara söyläşülärne ütkärgän Borrel’ annan soñ İlbaşı sarayı Aqordada Däwlät başlığı Qasıym Cumart Toqayıv tarafınnan qabul itelde.
Toqayıv säfärneñ ike yaqlı xezmättäşlekneñ köçäytelüe cähätennän bik möhim buluın belderde.
Awrupa Berlege belän yuğarı däräcäle êlemtälärne qanäğätlelek belän qarşılawların iskärtep uzuçı Toqayıv soñğı çorda Qazaqstan belän Awrupa Berlege arasındağı möhim säfärlär belän ike yaqlı xezmättäşlekneñ şaqtıy ölkädä ike yaqlı añlayış buldıruına basım yasadı.
Borrel’ isä Aqordadağı söyläşülärdän soñ ministr Tiläubärdi belän matbuğat wäkillärenä açıqlawlar yasadı.
Xäzerge waqıtta Awrupa Berlegeneñ Urta Aziyağa kertkän investiśiyäläreneñ 60%ınıñ Qazaqstanğa salınuın belderüçe Borrel’: "Awrupa Berlege Qazaqstannıñ iñ zur säwdä häm kapital salu urtağı. Bez mönäsäbätlärebezne tağın da arttırırğa häm nığıtırğa telibez”, - dip äytte.
Tiläubärdi dä, Awrupa Berlegeneñ 160 milliard dollar belän ileneñ iñ zur investor urtaqlarınnan berse buluına işarät itep, kiläçäktä Awrupa Berlege belän awıl xucalığı, yäşel iq’tisad, ênergetika, sanlılaştıru (śifrlaştıru), transport häm logistika ölkälärendä xezmättäşlekne törleländerüne maqsat itülären iskärtep uzdı.
Awrupa Berlege Şurası başlığı Şarl’ Mişel’neñ uzğan ayda Astanağa säfäre waqıtında Qazaqstan belän küp yaqlı xezmättäşlekne tağın da köçäytü, arttıru häm kiñäytü mäs’äläsendä kileşelgän ide.
Awrupa Berlege komissiyası başlığı Ursula von der Leyen dä Misırnıñ Şarm äl-Şäyıx qalasında ütkärelgän Berläşkän Millätlär Oyışması klimat üzgäreşläre qısa kileşüeneñ 27nçe Taraflar konferenśiyasınıñ Bötendönya liderlar sammitı waqıtında Qazaqstan Baş ministrı Alixan İsmailov belän Awrupa Berlege häm Qazaqstan arasında êşkärtelmägän matdä häm arındırılğan matdälärneñ täêmin itelüe ölkäsendä strategik urtaqlıq kileşüenä qul quyğan ide.
