Qarabaxqa avtobus säfärläre başlıy

Baqı-Şuşa, Baqı-Ağdam, Ahmädbäyli-Şuşa, Fuzuli xalıqara hawa mäydanı-Şuşa häm Bärdä-Ağdam yünäleşlärendä 24nçe ğıywardan başlap şähärlärara daimi avtobus säfärläre başqarılaçaq.

Säfärlär Ahmädbäyli-Şuşa yünäleşendä atnada 4 tapqır, başqa marşrutlarda 2 märtäbä yasalaçaq. Fuzuli xalıqara aêroportı-Şuşa avtobus reysları isä oçqıç säfärläre belän ber ük waqıtta bulaçaq.

Berençe êtapta barı tik Azärbaycan watandaşları Qarabaxqa avtobus belän säyäxät itä alaçaq.

Avtobus säfärläre näticäsendä watandaşlar, yawdan azat itelgän töbäklärgä barıp, xäzerge wazğıyätne üz küzläre belän kürä alaçaq.

Baruçılar iminlek häm mina qurqınıçı arqasında töbäktä tönlä qalmayaçaq, şul uq könne kire qaytaçaq.

Azärbaycan ğaskäre 30 yılğa yaqın ärmän okkupaśiyası astında qalğan Qarabaxnı 2020nçe yılnıñ 10nçı noyabr’ könne azat itkän ide.