Törekmänstan häm Üzbäkstanğa säyäxätlär faydalı buldı

Törkiyä tışqı êşlär ministrı Mäwlet Çavuşoğlu Törekmänstan häm Üzbäkstanğa säyäxätläreneñ ikeseneñ dä samimi atmosferada uzuın häm bik faydalı buluın belderde. Ul räsmi säfärdän qaytqannan soñ TRT Xäbär kanalına interv’yu birde.

Ministr Çavuşoğlu Üzbäkstan ilbaşı Şäwkät Mirziyoyevnıñ wazıyfasına kereşkännän soñ bik citdi reformalar uzdıruın söyläde. Törkiyä belgeçläre dä älege êşkä öleşlären kertte – täcribä urtaqlaştılar.

Çavuşoğlı Törekmänstan ilbaşı Gurbangulı Berdımöxämmädovnıñ isä Törkiyägä qarata qayber maxsus iskärmälär yasawın belderde. İldä barlıq oçışlar tıyılğan buluına qaramastan, Törek hawa yullarınıñ Törekmänabad şähärenä säfärlär başlawına röxsät iteläçäk. Monnan tış, Kovid-19 kizüe arqasında Törekmänstanğa ber ilneñ dä yök maşinaları kerä almıy. Ämma Törkiyänekenä yullar açılaçaq. Ber şart – şofyerlarğa koronavirus testı yasalğan bulırğa tiyeş.

Çavuşoğlu küptän tügel Törekmänstan belän Azärbaycannıñ Xäzär diñgezendä neft’ häm gaz yatmaları nisbätennän kileşü tözüen dä äytep uzdı.  Älege mäydanda qazılma baylıqlar çığaruda Törkiyä şirkätläre dä xezmättäşlekkä äzer. Çavuşoğlu äytkänçä, annan çığarılaçaq gaz häm neft’ne xäzerge waqıtta qullanıluçı ütkärgeçlär aşa Törkiyägä kiterü turında süz bara.