Tön'yaq Kipr törekläre ilbaşın saylıy

Bügen Tön’yaq Kipr törek cömhüriyätendä xalıq ilbaşın saylaw öçen ikençe turda tawışın birä. Ärcälär irtänge säğat’ 8dä açıldı.

İkençe turda xökümät başlığı häm Milli berlek partiyäseneñ kandidatı Ärsin Tatar belän bäysez kandidat, xäzerge ilbaşı Mostafa Akıncı yarışa.

11nçe oktyabr’dä uzğan berençe turda Ärsin Tatar tawışlarnıñ 32,34%ın, Akıncı 29,80%ın alğan ide. Anda barlığı 11 kandidat qatnaştı, ämma berse dä 50%lı çikne uza almawı öçen saylawlar ikençe turğa qaldı.

Tön’yaq Kipr törek cömhüriyätendä 199 meñ 29 saylawçı terkälgän. Alar kiçke säğat’ 6ğa qadär tawış birä ala. Yuğarı saylaw komissiyäse näticälärneñ kiçke säğat’ 8gä qadär bilgele bulaçağın farazlıy.