Törkiyä Ärmänstannı ğayepläde

Törkiyä Ärmänstannıñ, solıx kileşüen bozıp, Azärbaycannıñ Gäncä şähärenä raketa höcüme yasawın ğayepläde häm xalıqara cämäğat’çelekne älege qırın ğamälgä süzsez qalmasqa çaqırdı. Bu xaqta tışqı êşlär ministrlığınnan yasalğan belderüdä äytelä.

“Ärmänstannıñ, gumanitar utnı tuqtatu kileşüen bozıp, bügen irtängä taba Azärbaycannıñ ikençe zur şähäre Gäncägä raketa höcüme oyıştıruın qatğıy räweştä ğayeplibez,”-diyelä anda.

Raketa bäreleş cirlegennän 100 çaqrım yıraqlıqtağı Gäncädä ber toraq yortqa kilep töşä häm distälägän keşeneñ ğomeren özä. Belderüdä äytelgänçä, bu Ärmänstan idaräseneñ qaynar noqtanı Azärbaycan territoriyäseneñ tağın da êçenä taba cäyelderü niyätle provokaśiyälärennän berse.

“Bu höcüm ber ük waqıtta Ärmänstannıñ töbäkne qanunsız yawlap toruın däwam itü öçen xalıqara gumanitar xoquqnı bozunı bernigä sanamawın häm solıx telennän añlamawın kürsätä. Ärmänstannıñ bu agressiv ğamälläre şaqqattırmıy, ul anıñ härwaqıttağı basıp aluçan häm höcümçel xarakterınıñ açıq çağılışı. Xalıqara cämäğat’çelek nihayät’ bu xökuk tanımawçığa tuqta diyärgä tiyeş,”-diyelä belderüdä. Anda, şulay uq, wafat bulğan azärbaycanlılarğa Allahtan yarlıqaw sorala häm yaralılarğa tizräk terelü teläkläre citkerelä.