Qıtay belän Qırğızstan arasında strategik xezmättäşlek

Qıtay belän Qırğızstan arasında bağ’lanışlarnı arttırunı maqsat itep quyğan Komplekslı strategik xezmättäşlek turında deklaraśiya imzalandı.

Qırğızstan ilbaşı matbuğat üzägennän xäbär itülärençä, ilbaşı Sooronbay Cäänbäkov Qıtay başqalası Pekinğa räsmi säfäre waqıtında Qıtay xalıq cömhüriyäte däwlät başlığı Si Śzin’pin belän oçraştı. Alar küzgä küz häm delegaśiyälär arasında söyläşülär alıp bardı. Anda ike däwlätneñ mönäsäbätläre xaqında süz bardı. Cäänbäkov bu säfär xaqında bolay dide: “Qırğızstan Qıtaynı ışanıçlı kürşe, urtaq häm dus bularaq kürä. İlebez dä Qıtay öçen dus, ışanıçlı, kiläçäkkä qarawçı xezmättäş buldı häm şulay bulıp qalaçaq. Qıtayğa säfärem tışqı säyäsätebezneñ üzgärmäwçänlegen kürsätä”.

Cäänbäkov ilbaşı bularaq Qıtayğa täwge tapqır säfär yasadı.