Törek matbuğatına küzätü 18.08.2023
18nçe avgust könne çıqqan qayber törek gazetlarına küzätü
“Hürriyet” basması “Nemeś gazetı dön’yağa xäbär itte: Türkiyä êş başında” dip yaza.
Rusiyäneñ Ukraina aşlığın dön’ya bazarlarına çığarunı täêmin itüçe kileşüne ozaytmayaçağın belderüennän soñ Germaniyäneñ “Frankfurter Rundşau” gazetı Türkiyäneñ poziśiyäsenä iğ’tibarnı cälep itte. Ul ilneñ bernigä qaramastan Könbatış belän dä, Rusiyä belän dä söyläşülärne däwam itüe turında yazdı.
“Star” gazetı uquçıların AQŞ belän Türkiyä mönäsäbätlärenä qarata qızıqlı fiker belän tanıştıra.
Amerikanıñ “Foreign Affairs” jurnalı AQŞnıñ Türkiyä ilbaşı Räcäp Tayyip Ärdoğan belän qarşılaşırğa mäcbür bulaçağın citkerä. Basma bolay dip yaza: “Geosäyäsi häm xärbi ähämiyäte, iq’tisadi mömkinlekläre belän Türkiyä bäyäläp betergesez berlektäş. AQŞ kileşmäwçänleklärne tiränäytmäw öçen Türkiyägä qarşı kilüdän tayçına”.
“Yeni Şafak” gazetı Türkiyäneñ sälamätlek saqlaw sistemasın maqtawları turında yaza.
Berläşkän Ğaräp Ämirlekläreneñ Änkaradağı ilçese Said Sani äz-Zahiri Türkiyäneñ bik aldınğı häm üskän sälamätlek saqlaw sistemasına iyä buluın äytte. “Bezdän turizm öçen kilgän 140 meñ keşeneñ ber öleşe sälamätlek turizmı, mediśina öçen kilä,”-dide ul.
“Haber Türk” gazetı “Türkiyädä êşsezlek däräcäse kimede” dip citkerä.
Türkiyädä êşsezlek däräcäse yılnıñ ikençe çiregendä, berençe çirekkä qarağanda, 0,3 punktqa kimep, 9,7% täşkil itte. Êşkä urnaşuçılarnıñ sanı 151 meñgä arttı häm 31 million 513 meñ keşe buldı.
“Vatan” gazetı Türkiyä iq’tisadınıñ üseşen däwam itäçäge turındağı farazlarnı kiterä.
Türkiyäneñ qazna häm finans ministrı Mäxmät Şimşäk 2023nçe yılda, barlıq awır finans şartlarğa qaramastan, Türkiyä iq’tisadında 4,5% tiräse üseş küzallawların belderde. Kiläse 5 yıl êçendä global’ üseşneñ isä 3% tiräse buluı kötelä.
