Törek matbuğatına küzätü 5.07.2323
5 nçe iyül’ könne basılıp çıqqan qayber törek gazetlarına küzätü
“Hürriyet” gazetı “Ministr Fidannıñ Şveśiyägä reakśiyäse” turında yaza. Türkiyä tışqı êşlär ministrı Xakan Fidan Şveśiyädäge provokaśiyägä reakśiya belderde. “Bez Şveśiyädä Qor’ängä qarata yawız höcümne häm kisätülärebezgä qaramastan bu höcümgä küz yomıp qalunı tağın ber tapqır ğayeplibez. Şveśiyäneñ äğ’za buluı strategik häm qurqınıçsızlıq yağınnan NATO öçen yök bulırmı, fayda kitererme, bu xäzer bäxäslär öçen açıq”,- dide ministr Xakan Fidan.
”Star” gazetı Türkiyä häm Misır üzara ilçelär bilgelädelär” dip xäbär itä. Türkiyä belän Misır arasındağı diplomatik mönäsäbätlär ilçelek däräcäsenä kütärelde. Bu xaqtağı urtaq belderüdä Türkiyäneñ Qahirädäge tulı wäqalätle ilçese itep Salih Mutlu Şänne, Misırnıñ Änkaradağı ilçese itep Amr Êlxamaminı kürsätüe äytelä.
”Sabah” gazetı “THY iñ totrıqlı bayraq taşuçı aviakompaniya buldı” isemle xäbärendä citkergänçä, “Törek hawa yulları” aviakompaniyäse “World Finance” xalıqara finans oyışması tarafınnan “İñ totrıqlı bayraq taşuçı aviaśiya kompaniyäse” bülägenä layıq buldı.
“Haber Türk” gazetı “Yuğarı belem şurasınnan QSnıñ 2024 Bötendön’ya universitetları isemlegenä qağılışlı belderüe” turında yaza. Yuğarı belem şurasınnan yasalğan belderügä qarağanda, dön’yanıñ 2 meñ 963 aldınğı yuğarı uqu yortı bäyälängän häm 1 meñ 503 universitet urın alğan QS 2024 Bötendön’ya universitetları isemlegenä Türkiyädän 25 yuğarı uqu yortı kerde.
“Yeni Şafak” gazetı “Sofiya robot Çamlıca manarasınnan radiotapşıru alıp baraçaq” dip xäbär itä. Keşegä iñ küp oxşağan, yasalma intellekt produktı bulğan Sofiya robot 6-7 nçe iyül’ könnärendä İstanbuldağı Çamlıca manarasınnan Jenevada uzaçaq radiotapşıruda qatnaşıp dön’yada radio tapşıruı yasağan berençe robot bulaçaq.
