Törek matbuğatına küzätü 9.06.2023
9nçı iyün' könne çıqqan qayber törek gazetlarına küzätü
“Sabah” gazetı “Yaña çornıñ täwge Milli iminlek şurasında terrorçılıqqa qarşı köräş assızıqlandı” dip yaza.
Türkiyä ilbaşı Räcäp Tayyip Ärdoğan citäkçelegendä başqala Änkarada kiçä uzğan Milli iminlek şurası cıyılışınnan soñ çıqqan belderüdä: “Türkiyä ğasırınıñ başlanğıçı bulğan yaña çorda ilebezneñ qurqınıçsızlığı, tınıçlığı häm üseşen täêmin itü adımnarınıñ ber ük qararlılıq belän yasaluı assızıqlandı” diyelde.
“Vatan” gazetı Germaniyä mediasında Xakan Fidan turındağı analitik material xaqında citkerä.
Germaniyäneñ media oyışması “Redaktions Netzwerk Deutschland” Türkiyäneñ yaña tışqı êşlär ministrı Xakan Fidan turında analitik mäqalä bastırdı. Ul “Bar närsäne belüçe keşe: Xakan Fidan Türkiyäneñ yaña tışqı êşlär ministrı” başçası belän çıqtı. Mäqalädä mondıy yullar bar: “Milli küzläw oyışmasınıñ citäkçelegendä 13 yıl kiçergännän soñ berkem diyärlek Fidan qadär küp belmi. Bu anı Türkiyäneñ iñ köçle keşelärennän berse xälenä kiterä”.
“Star” gazetı Türkiyäneñ êksportı arttı di xäbär itä
Türkiyä êksportçılar berlegennän alınğan mäğ’lümatlarğa qarağanda, ilneñ êksportı bıyılnıñ 5 ayında , uzğan yılnıñ şul uq çorı belän çağıştırğanda, 0,2%qa artıp 102 milliard 520 million dollarğa citte.
“Yeni Şafak” gazetı yazğança, HÜRJET bik üzençälekle oçış sınawı ütkärde.
Türkiyäneñ öyränü häm ciñel xärbi oçqıçı HÜRJET kiçä üzençälekle oçış testınnan uzdı. Ul täwge tapqır hawada qızıllı-aqlı tösläre belän kürende. Anıñ bu ähämiyätle oçışında modernizaśiyälängän F-16 oçqıçı da ozatıp bardı.
“Haber Türk” gazetı Farsı qultığınnan kilüçe turist sanınıñ artuın citkerä
Türkiyä qunaqxanäçelär berlege Yaqın Könçığış häm Farsı qultığı regionı turistlarınıñ il belän qızıqsınuı däwam itüen belderde. Annan kilgän turist sanı täwge 4 ayda, uzğan yıl belän çağıştırğanda, 13%qa arttı häm 1 million 22 meñgä citte.
