Törek matbuğatına küzätü 02.03.2023
Qayber törek basmalarına küzätü
“Yeni Şafak” gazetı yazğança Ğadellek häm qalqınu partiyaseneñ Mäclestäge törkem cıyılışında çığış yasağan Törkiyä ilbaşı Räcäp Tayyip Ärdoğan saylaw köne belän bäyle bäxäslärgä soñğı noqtanı quydı. Ärdoğan bolay dip belderde: “Şunı yaxşı belep torığız, bu xalıq inşallah 14 mayda kiräkkänne başqaraçaq.”
“Vatan” basması beldergänçä êpiŝentrı Kahramanmaraş bulğan cir teträwlär AQŞta tikşerenü mäs’äläsenä äylände. Monıñ säbäbe – Könçığış Anadolu sızığınıñ AQŞnıñ Kaliforniya ştatınnan uzuçı San Andreas geologik sızığına bik oxşawı. New York Times gazetına kürä belgeçlär Türkiyädäge zilzilälärneñ Kaliforniyadä barlıqqa kilä alaçaq cir teträwlär mäs’äläsendä küp närsä öyrätä aluçı buluın belderde.
“Star” gazetı xäbärenä kürä Xalıqara xäbär portalı Euronews “Türkiyä dön’yanıñ här poçmağınnan turist cälep itä” isemle xäbärendä 2022 yılda 51 millionnan artıq turistnıñ Türkiyägä kilüen belderde. İstanbul belän ber rättän Antal’ya, Muğla, İzmir, Kapadokiya häm Konya kebek şähärlärneñ cir teträwdä zıyan kürgän töbäklärdän çittä buluı, cimerüçe afätkä qaramastan turistlarnıñ säyäxät plannarın kiçektermäwe citkerelde.
“Hürriyet” basması citkergänçä kredit reyting agentlığı Moody’s Türkiyä öçen üseş kötkännären 2023 yıl öçen 2%tan 2,3%ka, 2024 öçen 3%tan 4%ka kütärde.
“Habertürk” gazetı yazğança Qıtaylı êlektr avtomobil’ citeşterüçe şirkät BYD (Build Your Dreams) Türkiyä bazarına kerü öçen ALJ Türkiyä belän kileşü tözede. BYDneñ êlektrlı transport çarası häm säwdä modelläreneñ Türkiyädäge distrib’yutorlığı öçen niyät xatı imzalandı.
