Törek matbuğatına küzätü 13.02.2023
13 nçe fevral' könne basılıp çıqqan qayber törek gazetlarına küzätü
“Star” gazetı “Cir teträwdän soñ Türkiyägä kilgän berençe lider” isemle yazmasında citkergänçä, Katar ämire Şäyex Tämim bin Xamäd Äl Sani Kahramanmaraştağı cir teträwlärdän soñ ilbaşı Räcäp Tayyip Ärdoğan belän oçraşıp söyläşer öçen Türkiyägä kilde. Ärdoğan Äl Saninı İstanbuldağu Vahdettin sarayında qabul itte. Katar ämire cir teträwlärdän soñ Türkiyägä kilgän berençe lider buldı.
”Haber Türk” basması “Greśiya yärdäme däwam itä” dip yaza. Türkiyädäge cirteträwlärdän soñ ilgä böten dön’yadan yärdämnar däwam itkändä Greśiya tışqı êşlär ministrı Dendias Adanağa kilde. Türkiyä tışqı êşlär ministrı Mävlüt Çavuşoğlu Dendiasnı qarşı aldı häm soñraq ike ministr Hatayğa kittelär. Dendias biredä yasağan belderüendä Greśiyäneñ Türkiyägä bulışuı däwam itäçäk dip citkerde.
”Hürriyet” gazetı “Räxmät kürşe” isemle xäbärendä yazğança, Antaliyanıñ Kaş rayonınnan 7,5 çaqrım yıraqlıqtağı Greśiya utrawı Meystan Türkiyädäge zilzilälärdä zıyan kürüçelärgä yärdäm cibärelde. Yärdäm tartmalarına “Qaderle kürşe, cir teträwlärdä sezneñ yortlar cimerelgändä bezneñ yöräklär dä özgälände” dip yazılğan.
”Vatan” gazetı “Türkiyä – ber yöräk, Türkiyä öçen yärdäm kampaniyäse” isemle xäbärendä citkergänçä, Türkiyä televideniye kompaniyäläre cämğıyäte cir tertäwlärdän soñ yärdäm kampaniyäse oyıştıru qararına kilde. Çara “Türkiyä ber yöräk” şiğare astında 15 nçe fevral’dä Türkiyä waqıtı belän 20 säğat’tä uzaçaq. Yärdämnär “Qızılay” oyışması belän Afätlär häm ğadättän tış xällär belän idarä itü räislege (AFAD) xisaplarında cıyılaçaq.
“Sabah” basması “Andjelina Djoli dön’yanı yärdämgä çaqırdı” dip xäbär itä. Tanılğan Amerika aktrisası Andjelina Djoli üzeneñ sośial’ media akkauntında Kahramanmaraştağı cir teträwneñ simvolik fotosurätläreneñ berse bulğan, zilzilädä ülgän 15 yäşendäge qızınıñ qulların totqan äti fotoräseme belän dön’yanı cir teträwdä zıyan kürüçelärgä yärdäm itärgä öndäde.
