Törek matbuğatına küzätü 27.12.2022.
27 nçe dekabr' könne basılıp çıqqan qayber törek gazetlarına küzätü
“Haber Türk” basması “Qara diñgezdä yaña tabiği gaz çığanağı tabıldı” dip yaza.
Türkiyä ilbaşı Räcäp Tayyip Ärdoğan Qara diñgezdä 58 milliard kub metr yaña tabiği gaz çığanağı tabıluın belderde. Ul Qara diñgezdäge gaz rezervınıñ 710 milliard kub metrğa citüenä basım yasap,”Tabiği gaznıñ xalıqara bazalardağı bügenge bäyäse 1 trillion dollar” dide.
”Star” basması “Süriyäneñ tön’yağında qurqınıçsızlıq liniyäse tözeläçäk” dip xäbär itä.
Türkiyä ilbaşı Ärdoğan kiläse yılda terrorçılıqnı çığanağında yuq itü strategiyäsen böten kön’yaq çiklär buyınça tormışqa aşıraçaqların äytte. “İlebezgä ayıruça Süriyädän kilgän qurqınıçlarnı tulısınça yuq itü öçen çik ar’yağında 30 çaqrımlıq qurqınıçsızlıq liniyäbezdäge buşlıqlarnı yabu öçen yaña adımnar yasayaçaqbız” dide.
”Hürriyet” gazetı “Ärdoğan 3 yıl elek kisätkän ide” isemle yazmasında citkergänçä, Franśiya başqalası Parijda öç keşe ülgän höcümnän soñğı waqıyğalarda “PKK” tarafdarları küp sanda maşinanı äyländerep alarğa ut törttelär. Bu waqıyğalarda küp keşe cäräxätlände. Türkiyä ilbaşı Ärdoğan 2019 nçı yılda yasağan çığışında terrorçı oyışmalarnı yaqlawçı illärgä “Sez döres êşlämisez. Bügen üz qulığız belän tuyındırğan terror yılanı axır çiktä sezne dä çağaçaq” dip kisätkän ide.
”Sabah” gazetı “Franśiya ilçese tışqı êşlär ministrlığına çaqırıldı” dip citkerä. Franśiyäneñ Änkaradağı tulı wäqalätle ilçese Xerv Magro tışqı êşlär ministrlığına çaqırtıldı. Franśiya ilçesenä “PKK/PYD/YPG” dairäläreneñ Türkiyägä qarşı qara propaganda başlatuları häm Fransiya xökümäte räsmiläre belän qayber säyäsätçelärneñ bu propagandağa quşılularına qanäğät’sezlek citkerelde.
“Yeni Şafak” gazetı “Soğud Ğaräbstanınnan Türkiyägä 3,3 trillion dollar investiśiya maqsatı” isemle xäbärendä yazğança, Soğud Ğaräbstanınnan 100 dan artıq şirkät investiśiylär häm partnyerlıq öçen Türkiyägä kilde. İke il arasında säyäsi mönäsäbätlär tudırğan uñay atmosfera investiśiya häm säwdä ölkälärendä çağılış taptı. Soğud Ğaräbstanı investiśiya ministrı Xalid bin Abdulaziz Al Falix 2030 nçı yıl vizionı qısalarında Türkiyägä 3,3 trillion dollar külämendä turıdan –turı investiśiya kertüne maqsat itep quyuların belderde.
