Törek matbuğatına küzätü 21.12.2022
21 nçe dekabr' könne basılıp çıqqan qayber törek gazetlarına küzätü
“Hürriyet” gazetı “Çavuşoğlunıñ Şveśiyägä reakśiyäse” isemle xäbärendä citkergänçä, Türkiyä tışqı êşlär ministrı Mävlüt Çavuşoğlu Şveśiya yuğarı sudınıñ qaçıp yörüçe “FETÖ” terror oyışması äğ’zası Bülänt Känäşne Türkiyägä qaytarıp birü üteneçen kire qağuınıñ bik tiskäre buluın belderep, “Bez Şveśiya häm Finlyandiyädän matur süzlär tügel, ä konkret çaralar kürergä telibez” dip äytte.
”Star” gazetı Hulusi Akarnıñ “Bez berkemnän röxsät almıybız” digän süzlären alğı planğa çığara. İtaliya gazetına interv’yu birgän Türkiyä saqlanu ministrı Hulusi Akar Süriyäneñ tön’yağındağı terror maqsatlarına qarata ixtimal xäräkät turında bolay dide: “PKK/YPG” Türkiyäneñ tınıçlığın häm qurqınıçsızlığın maqsat itep ala. İlebezne häm çiklärebezne saqlaw öçen Berläşkän Millätlär Oyışması kileşüeneñ 51 nçe maddäsennän kilep tuğan üzebezne yaqlaw xoquqın qullanabız. Monı êşlägändä berkemnän dä röxsät almıybız”.
“Vatan” gazetı “Cirle hawa saqlanu sistemaları öçen yaña qarar” isemle xäbärendä yazğança, İlbaşı Räcäp Tayyip Ärdoğan citäkçelegendä uzğan saqlanu sänäğäte başqarma komitetı cıyılışınnan soñ yasalğan belderüdä Türkiyäneñ hawa saqlanu sistemasın nığıtu, köçäytü maqsatınnan Siper, Hisar häm Sungur sistemaların yaña küpläp citeşterü qararı qabul itelüe citkerelä.
“Yeni Şafak” basması “Bayraktar TB2 satıp alğan illär sanı 27 buldı “ isemle yazmasında citkergänçä, Albaniya xökümäte belän Baykar texnologiya şirkäte arasında Bayraktar TB2 qorallı keşesez oçu apparatın satıp alu turında kileşü tözelde. Şulay itep Türkiyädän Bayraktar TB2 satıp alğan illär sanı 27 buldı.
“Haber Türk” gazetı “Koca Yosıf” Türkiyägä qayttı dip yaza.
10 ay êlek yärdäm alıp baru häm Türkiyä watandaşların êvakuaśiyäläw öçen Ukrainağa kitkän häm hawa kiñlege yabılu säbäple Borispol aêroportında qalğan “Koca Yosıf” dip atalğan ike “A400M” oçqıçı Türkiyägä kire qayttı.
