Törek matbuğatına küzätü 22.11.2022

“Xäbär türk” gazetı yazğança Türkiyä ilbaşı Räcäp Tayyip Ärdoğan yäkşämbe könne Ğıyraq häm Süriyäneñ tön’yağına separatist PKK/YPG terror oyışmasına qarşı başlanğan Pençe-Kılıç operaŝiyasendä kiräkkänne başqaruların häm monnan soñ da başqaraçaqların belderde.

“Sabah” basması beldergänçä Milli saqlanu ministrı Hulusi Akar “Pençe-Kılıç” xäräkätendä 184 terrorçınıñ täêsirsez xälgä kiterelüen açıqladı. “Terrorçılar öçen isäp birü waqıtı” dip äytkän ministr Akar: “Monnan alda başqarğannarı belän uzğan atnada Beyoğlunda, kiçä dä çik buyı liniyase Öncüpınar häm Karkamıştağı êşläre öçen cawap biräçäklär,” – dide.

“Yeni Şafak” gazetı Gaziantepneñ Karkamış rayonına oyıştırılğan raketalı höcüm belän bäyle bularaq açıqlaw yasağan İlbaşı idaräseneñ êlemtä räislege başlığı Fahrettin Altunnıñ süzlären uquçıları belän urtaqlaşa: “Ğayepsez keşelärgä höcüm itüçe YPG/PKK höcümnärenä qarşı iminlek köçlärebez citärle däräcädä cawap birä. Soñğı terrorçı täêsirsez xälgä kiterelgängä qadär bu operaŝiyalärebez däwam itäçäk.”

“Star” basması citkergänçä Ğıyraqnıñ häm Süriyäneñ tön’yağında terrorçılıqnı beterü öçen Türkiyä başlatqan “Pençe-Kılıç” hawa xäräkäte xaqında açıqlaw yasağan Şveŝiya tışqı êşlär ministrı Tobias Bil’ström: “Türkiyä - terror höcümenä duçar qalğan il, terror höcümenä duçar qaluçı däwlätlärneñ saqlanu xaqı bar,” – dide.

“Xörriyät” gazetı yazğança Rusiyä-Ukraina arasındağı suğış 24 fevral’dan birle däwam itkändä NATO ğomüm särqätibe Yens Stoltenberg Türkiyä häm däwlät başlığı Räcäp Tayyip Ärdoğannıñ aşlıq koridorı kileşüeneñ ozınaytıluında, äsirlär belän almaşuda töp häm möhim rol’ uynawın belderde.