Törek matbuğatına küzätü 21.11.2022
21nçe noyabr' könne çıqqan qayber törek gazetlarına küzätü
“Haber Türk” gazetı Süriyä häm Ğıyraqta uzğan hawa xäräkäte turında citkerä.
Törek xärbi oçqıçları kiçä Süriyä häm Ğıyraqnıñ tön’yağındağı terrorçı oyalarına hawa xäräkäte oyıştırdı. Milli saqlanu ministrlığı belderüendä: “Xäräkättä terrorçılarnıñ sıyınu urını, mäğarä, qoral saqlağıçları, ştab häm öyrätü lager’larınnan toruçı 89 ob’yekt yuq itelde, bik küp terrorçı täêsirsez xälgä kiterelde” diyelä.
“Star” gazetı älege xäräkät uñayınnan ministr Akar yasağan belderüne citkerä.
“Pänçä Qılıç xäräkäte”n Türkiyä milli saqlaqnu ministrı Xulusi Akar Törek qorallı köçläreneñ komandirları belän bergä Xärbi hawa köçläre xäräkät üzäge aşa ütkärde. “Terrorçılarnıñ sıyınu urını, bunkerı, mäğarä, tunnele, saqlağıçları uñışlı räweştä yuq itelde. Terrorçı oyışmanıñ ştabları da töz atu belän utqa totıldı,”-dide ministr.
“Hürriyet” gazetı Ömär Çälikneñ xäräkätkä qarata äytkän süzlären kiterä.
Türkiyäneñ xakimiyättäge AK partiyä ğomum räise urınbasarı häm süzçese Ömär Çälik kiçä sośial’ mediada bolay dip yazdı: “Pänçä Qılıç hawa xäräkäte belän tağın ber tapqır ilebezgä yanawçılarnıñ niçek awır tüläyäçägen kürsättek”.
“Sabah” gazetı Altunnıñ süzläre belän “Terroçılıqnı alğa taba da oyasında yuq itäçäkbez” dip yaza.
İlbaşı êlemtä idaräse räise Fäxrettin Altun sośial’ mediada Pänçä-Qılıç hawa xäräkäte belän bäyle yazma urtaqlaştı. “Terrornıñ häm terrorçılıqqa iğanä yasawçılarnıñ Türkiyäne totrıqsızlaştıru tırışlıqlarına alğa taba da qomaçawlayaçaqbız, terrorçılıqnı oyasında yuq itäçäkbez” diyelä anda.
“Yeni Şafak” gazetı Çavuşoğlunıñ mesxet törekläreneñ Türkiyägä kilüe uñayınnan äytkän süzlären alğı planğa çığara.
Tışqı êşlär ministrı Mäwlet Çavuşoğlu Ukrainanıñ Xerson şähärendä qalğan 88 mesxet töregeneñ Türkiyägä kiterelüen xäbär itte. “Ukrainanıñ Xerson şähärendä qalğan häm iniśiativalarıbız belän Rusiyä häm Gruziya aşa ilebezgä kiterelgän 88 axıskalı qardäşebez, watanığızğa xuş kildegez! Qayda ğına bulsalar da, bez härwaqıt mesxet törekläreneñ yanında häm bu şulay bulaçaq ta” dip yazdı ministr üzeneñ sośial’ media akkauntında.
