Törek matbuğatına küztü 28.07.2022

“Hürriyet” gazetı “Aşlıq koordinaśiyä üzäge açıldı” dip yaza.

Rusiyä-Ukraina suğışı belän başlanğan aşlıq krizisın beterergä tiyeşle üzäk kiçä İstanbulda açıldı. Anda Törkiyä häm BMO wäqalätleläre belän bergä Rusiyä häm Ukraina yaqları da urın aldı. Ukraina portlarında kötüce 25 million tonnadan artıq aşlıq İstanbul aşa böten dön’yağa cibäreläçäk.

“Yeni Şafak” gazetı citkergänçä, İslam teläktäşlege uyınnarın ilbaşı Ärdoğan açaçaq.

Törkiyäneñ Kon’ya şähärendä 9nçı avgusttan 18enä qadär 5nçe İslam teläktäşlege uyınnarı uzaçaq. Anıñ açılışında ilbaşı Räcäp Tayyip Ärdoğan da qatnaşaçaq. Yarışlarda İslam xezmättäşlege oyışmasına kerüçe 56 däwlättän 6 meñgä yaqın sportçınıñ qatnaşuı kötelä. Anda 24 sport törendä köç sınaşaçaqlar.

“Star” gazetı Ärsin Tatarnıñ “Bez Könçığış Urta diñgezdä törki dön’yanıñ wäkile” digän süzlären citkerä.

Tön’yaq Kipr Törek cömhüriyäte ilbaşı Ärsin Tatar kipr törekläreneñ Urta diñgezneñ könçığışında törki dön’ya wäkilläre buluın belderde. “Şuña kürä Könçığış Urta diñgezdä kiprlı töreklärneñ yäşi aluı öçen Törkiyäneñ tulı yärdäme belän yaña säyäsätebezne axırğa qadär däwam itärgä tiyeşbez,”-dide ul.

“Vatan” gazetı “Törkiyä investiśiyälär öçen iñ ışanıçlı portlarnıñ berse” dip yaza.

Törkiyä sänäğat’ häm texnologiyä ministrı Mostafa Varank Awrupa, Aziya häm Afrikanıñ kiseşü noqtası bulğan Törkiyäneñ bügen investiśiyälärdä dön’yanıñ iñ ışanıçlı portlarınnan berse buluın söyläde. “Törkiyä kadrlar mömkinlege, planlanğan sänäğat’ töbäkläre häm tizlätelgän innovaśion êkosisteması belän östenlekkä iyä däwlät,”-dide ul.

“Haber Türk” gazetı “TOGG mart ayında yullarda bulaçaq” dip citkerä.

Törkiyä palatalar häm birjalar berlege räise Rifat Xisarcıklıoğlu 29nçı oktyabr’dä ilneñ avtomobil’ iniśiativ törkeme TOGGnıñ konteynerın açaçaqların, şunnan soñ 100% êlektrlı cirle avtomobil’ne dön’ya bazarına çığaraçaqların belderde. “Martta barıbız bergä cirle maşinağa utıra başlıybız,”-dide ul.