Törek matbuğatına küzätü 23.05.2022

“Sabah” gazetı “Törkiyäneñ NATO reakśiyäse AQŞ matbuğatında” dip yaza

Törkiyäneñ Skandinaviyä däwlätläre Şveśiyä häm Finlyandiyäneñ NATOğa ğarizasın veto itep üz şartların kertüe dön’yada kiñ yañğıraş taptı. Amerika Quşma Ştatlarında çığuçı “The Hill” gazetı da temanı kütärep AQŞlı senator Ben Kardinnıñ süzlärenä urın birde. Ul Törkiyäneñ Rusiyä-Ukraina suğışı waqıtında bik yaxşı êşçänlek kürsätüen assızıqlıy. “Törkiyä belän yaxşı mönäsäbättä bulu bezneñ faydağa” di senator.

“Yeni Şafak” gazetı tışqı êşlär ministrı Çavuşoğlunıñ İzrailgä kitüen citkerä.

Törkiyä tışqı êşlär ministrı Mäwlet Çavuşoğlu 25nçe may çärşämbe könne İzrailgä yul tota. Älege säfär 15 yıldan soñ Törkiyädän İzrailgä tışqı êşlär ministrı däräcäsendä täwge ziyärät bulaçaq.

“Star” gazetı ministr Kocanıñ maymıl çäçäge xastalığı turındağı belderüenä urın birä.

Törkiyä sälamätlek saqlaw ministrı Fäxretdin Koca maymıl çäçäge xastalığı turında: “Xaywannardan çıqqan, qayçaq keşelärgä yoğa aluçı bu virus pandemiyä kiterep çığarmas,”-dide.

“Haber Türk” gazetı Yörük köbäle texnikasınıñ Afrikada berençe wazıyfasına kereşüen citkerä.

Törkiyä saqlanu sänäğate qul astında yasalğan köbäle xärbi texnika öçen “Nurol makina” şirkäte 4 däwlät belän kileşü tözede. Berençe bulıp ul Çadqa cibärelde.

“Hürriyet” gazetı VakıfBank komandasınıñ Awrupa voleybol konfederaśiyäse ligasında çempion buluın xäbär itä.

Törkiyä häm Dön’ya çempionı VakıfBank Awrupada çempionnar ligasınıñ superfinalında Imoko Volley Konel’yanonı 3kä 1 ciñep östen çıqtı. Şulay itep komanda üz tarixında 5nçe tapqır Awrupa çempionı buldı.