Törek matbuğatına küzätü 17.02.2022

“Xäbär türk” gazetı yazğança Törkiyä ilbaşı Räcäp Tayyip Ärdoğan Kovid-19 kizüe waqıtında Törkiyäneñ ayırmalı säyäsät alıp baruın häm citeşterügä xuplaw kürsätüen belderde. “Bu barışta investiŝiya, êş belän täêmin itü, citeşterü, êksport häm profiŝit maqsatlı iqtisad programmabıznı täwäkkällek belän ğamälgä kertep, kizüneñ berençe ayındağı yuğaltularnı kompensaŝiyaläp kenä qalmadıq, alğaraq kittek. Êş belän täêmin itü häm êksportta ber-ber artlı rekord quydıq,” – dide ul.

“Xörriyät” basması beldergänçä Törkiyäneñ tışqı êşlär ministrı Mäwlüt Çavuşoğlu Rusiyä häm Ukraina tışqı êşlär ministrları belän telefonnan ayırım söyläşü ütkärde. Söyläşülärdä Rusiyä-Ukraina kiyerenkelege qaraldı, ministr Çavuşloğlu Törkiyäneñ Rusiyä häm Ukraina arasındağı cıyılışlarnı ütkärergä äzer buluın qabatladı.

“Sabah” gazetı citkergänçä Berläşkän Ğaräp Ämirlekläre Törkiyädä kertäçäk 10 milliard dollarlık investiŝiyaneñ yünäleşe bilgele buldı. Farsı qultığınnan kiläçäk berençe investiŝiya saqlanu sänägätenä kerteläçäk. Berläşkän Ğaräp Ämirlekläre ayıruça Törkiyädä igençelek, ênergetika, azıq-tölek häm informatika tarmaqlarına da investiŝiya planlıy.

“Yeni Şafak” basması xäbärenä kürä Törkiyä Qara diñgezdän xäzergä qadär ike zondajda barlığı 540 milliard m3 gaz çığardı. Monıñ yärdämendä Törkiyädäge binalarnıñ 25 yıllıq gaz ixtıyacın qanäğat’länderep bula. Gaz ağımı öçen monnan alda 2023nçe yıl urtası küzdä totıla ide. Läkin êşçänleklärne yañadan küzdän kiçergännän soñ kötelgän kön irtäräk tä bula ala. 2023nçe yılnıñ berençe çiregendä ük Qara diñgez gazı öylärne cılıtaçaq.

“Star” gazetı yazğança Nobel’ büläge iyäse törek belgeçe, professor, doktor Aziz Sancar Törkiyä kürsätkän söyü belän ğorurlanuın, bu söyüneñ 10 Nobel’ bülägennän dä möhim buluın äytep: “85 million keşe minem Törkiyäne yaratuımnı, Törkiyägä xezmät itüemne, Törkiyäne qaderläwemne, êşçänlekläremneñ Törkiyäneñ uñışı bularaq kürüemne belä,” – dide.