Törek matbuğatına küzätü 16.02.2022
16nçı fevral' könne çıqqan qayber törek gazetlarına küzätü
“Star” gazetı Dubayda uzğan Törkiyä milli köne turında citkerä.
Törkiyä ilbaşı Räcäp Tayyip Ärdoğan Berläşkän Ğaräp Ämirleklärendä Dubay EKSPO-2020 Törkiyä milli köne programmasında çığış yasadı. “Awıl xucalığınnan başlap iq’tisadqa qadär – här tarmaqta däwamlılıqqa ireşü – bezneñ östenlekle maqsatıbız. Törkiyäneñ EKSPOğa älege êkologik sub-tema mäydanında qatnaşuı – bu alandağı köçle poziśiyäsen çağıldıra,”-dide ul.
“Vatan” gazetı ilbaşı Ärdoğannıñ “Bez här yärdämgä äzer” digän süzlären alğı planğa çığara.
Törkiyä ilbaşı Ärdoğan Berläşkän Ğaräp Ämirleklärendä êşmäkärlär häm investorlar belän oçraştı. “Liderlarnıñ wazıyfası – säwdä, saqlanu, turizm, transport – här tarmaqta nigez äzerläw. Säwdä ministrlığıbız, sänäğat’ häm texnologiyä ministrlığıbız, başqa oyışmalarıbız investiśiyä proyektlarında sezgä här yärdämne kürsätergä äzer,”-dide Törkiyä ilbaşı.
“Hürriyet” gazetı “İzrail ilbaşı Gerśog Törkiyägä kilä” dip xäbär itä.
Törkiyä belän İzrail mönäsäbätlärendä yaña çor başlana. İzrail ilbaşı İsaak Gerśog 9-10nçı mart könnärendä Törkiyägä säfär yasıy.
“Habertürk” gazetı “AQŞnıñ Änkaradağı ilçese täwge tapqır çığış yasadı” dip yaza.
AQŞnıñ Änkaradağı ilçese Djeffri Fleyk wazıyfasına kereşkännän birle berençe tapqır Amerika häm Törkiyä mönäsäbätläre turında belderü yasadı. Ul 70 yıl NATOnıñ ähämiyätle äğ’zası bulğan Törkiyäneñ ikençe iñ zur F-16 xärbi oçqıçları flotına iyä ikänlegen äytte. “F-16lar belän bäyle söyläşülär uñay däwam itä. Tizdän AQŞtan yuğarı däräcäle wäqalätlelär kiläçägen uylıym,”-dide ilçe.
“Yeni Şafak” gazetı “Flay Dubay martta Sabiha Gökçän aêroportına reyslar yasıy başlıy” dip citkerä.
Berläşkän Ğaräp Ämirlekläreneñ hawa yulı şirkäte Flay Dubay 2nçe marttan İstanbulnıñ Sabiha Gökçän aêroportına oçışlar başlayaçağın belderde. Şulay itep şirkätneñ Ämirleklär belän İstanbul arasındağı atnalıq reysları 12gä citäçäk.
