Törek matbuğatına küzätü 08.02.2022
Qayber törek basmalarına küzätü
“Xörriyät” gazetı yazğança İlbaşı idaräse süzçese İbrahim Qalın koronavirus yoqtırğan Törkiyä ilbaşı Räcäp Tayyip Ärdoğannıñ terelügä baruın belderde. “Tabiblar berniçä kön êçendä test näticäseneñ negativ bulaçağın äytä,” – dide ul. İlbaşınıñ xäläl cefete Äminä Ärdoğan da Tvitterda tübändägeçä yazdı: “Xälebez yaxşı.”
“Yeni Şafak” basması beldergänçä Törkiyä ilbaşı Räcäp Tayyip Ärdoğan Rusiyä-Ukraina krizisına säyäsi çişeleş tabu öçen başlatqan diplomatik kereşügä NATO häm Germaniya xuplaw kürsätep, räxmätlären belderde. NATO ğomüm särqätibe Yens Stoltenberg Ärdoğanğa şaltıratuın äytep: “Säyäsi çişeleşneñ tabıluı öçen aktiv yärdäme häm şäxsi tırışlıqları öçen räxmätemne citkerdem,” – dide. Germaniyaneñ Tışqı êşlär ministrlığı süzçese Kristofer Burger da Törkiyäneñ tırışlıqlarınnan qanäğat’ buluların äytte.
“Xäbär türk” gazetı citkergänçä Tön’yaq Kipr Törek Cömhüriyäte Awrupa Komissiyaseneñ Reforma yärdäme bülege ğomüm mödire Mario Navanıñ Kiprda ike däwlätle çişeleşneñ qabul itelmäslek buluı turındağı açıqlawlarına qırıs reakŝiya kürsätte. Tön’yaq Kipr Törek Cömhüriyäte tışqı êşlär ministrlığı tübändäge açıqlawnı yasadı: “Awrupa Berlege räsmi zatlarınıñ Kipr mäs’äläseneñ çişeleşenä añlatma birep, xökem çığaruı äxlaqıy häm qanuni tügel.”
“Star” basması xäbärenä kürä Törkiyäneñ êçke êşlär ministrlığına qarağan Afät häm ğadättän tış xällär räislege AFAD koordinaŝiyasendä 11 yärdäm oyışması belän cibärelgän “İgelek poyezdı” Äfğanstanğa barıp citte. Törkiyä ilbaşı Räcäp Tayyip Ärdoğannıñ boyırığı belän êşkä kereşkän oyışmalarnıñ räsmi zatları poyezdnıñ koordinaŝiyase öçen zur tırışlıq quyıp, awır wazıyfanı uñışlı räweştä cirenä citkerde.
“Sabah” gazetı yazğança Kovid-19 kizüenä qarşı yasalğan cirle vakŝina Turkovaknı kiçä Törkiyädä qadıy başladılar. Watandaşlar: “Ğorurlanabız häm şatlanabız. Däwlätebez häm törek tabiblarına ışanabız,” – dide.
