Törek matbuğatına küzätü 28.10.2021

“Sabah” gazetı yazğança Törkiyä ilbaşı Räcäp Tayyip Ärdoğan kiçä Änkarada Çadnıñ waqıtlıça däwlät başlığı Möxämmäd İdris İtno belän ütkärgän söyläşüdän soñ oyıştırılğan matbuğat oçraşuında tübändägeçä citkerde: “Çad belän säwdä ölkäsendäge mönäsäbätlärebezne tiränäytüne maqsat itäbez. Maqsatıbız – säwdä külämen 200 million dollarğa citkerü. FETÖ terror oyışmasına qarşı köräştä Çadnıñ yärdämen onıta almıybız.”

“Xörriyät” basması beldergänçä İlbaşı süzçese İbrahim Qalın kiçä Amerika Quşma Ştatlarınıñ İminlek kiñäşçese Djeyk Sallivan belän ütkärgän telefon söyläşüendä ike yaqlı mönäsäbätlär, F-35/F-16 xärbi oçqıçları mäs’äläse, dön’yaküläm klimat üzgäreşe, Äfğanstan, Süriyä, Liviya, Tawlı Qarabax, Greŝiya, Könçığış Urta diñgez häm qalğan regional’ täraqqıyät’lär qaraldı.

“Watan” gazetı xäbärenä kürä “Baykar” qorallı keşesez hawa apparatı Bayraktar TB2neñ tağın ber ilgä êksportlanaçağın citkerde.

Şirkätneñ Tvitterdağı akkauntında yasalğan açıqlawda yaña ilneñ iseme uzmıy. “Tağın ber il belän Bayraktar TB2 qorallı keşesez hawa apparatı kileşüen tözedek. Bu kileşü belän hawa apparatı êksportlanaçaq il sanı 13 buldı,” – diyelä açıqlawda.

“Yeni Şafak” basması citkergänçä İstanbul aêroportı Xalıqara Hawa Mäydannarı Şurası tarafınnan oyıştırılğan “17nçe Xalıqara Hawa Mäydannarı Şurası Awrupa büläkläre” qısalarında “Awrupanıñ iñ yaxşı aêroportı” häm “İreşelä ala torğan aêroport” büläklärenä layıq buldı.

“Star” gazetı yazğança Törkiyädän bu yılnıñ 10 aylıq çorında 83 ilgä 125 million dollarlık çäçäk êksportı başqarıldı. İñ küp êksport yasalğan illär isä Niderland, Angliya, Germaniya, Üzbäkstan, Rumıniya häm Bolgariya buldı.