Törek matbuğatına küzätü 09.03.2021
9nçı mart könne çıqqan qayber törek gazetlarına küzätü
“Sabah” gazetı “Soñğı çorda ilgä çit il kapitalı ağımı arta” dip yaza.
Törkiyä ilbaşı Räcäp Tayyip Ärdoğan 11nçe Boğaziçi sammitına videoyullamasında ilneñ üseştä Qıtaydan soñ ikençe buluın belderde. “Soñğı waqıtta ilebezgä çit il kapitalı kerü arta,”-dide ul.
“Yenişafak” gazetı “Angliyä xökümäte räise Boris Djonson PKKnı ğayepläde” dip xäbär itä.
Angliya xökümäte räise Boris Djonson ilbaşı Ärdoğan belän telefonnan söyläşkändä Ğıyraqnıñ tön’yağındağı Gara töbägendä üterelgän 13 Törkiyä watandaşı öçen qayğı urtaqlaşuın belderde. Ul älege üterüne başqaruçı terrorçı oyışma PKKnı ğayepläde.
“Habertürk” gazetı citkergänçä, "Oppo” nıñ Tuzla fabrikası 1 meñ keşegä êş biräçäk.
Sänäğat’ häm texnologiya ministrı Mostafa Varank Qıtaynıñ aqıllı telefon markası “Oppo”nıñ İstanbulnıñ Tuzla rayonında tözelüçe fabrikasında test citeşterü başlanuın xäbär itte. Anıñ äytüençä, ob’yekt tulı quätenä êşli başlağaç 1 meñ keşene êş belän täêmin itäçäk.
“Star” gazetı “Barı tik Törkiyädä citeşä” dip qızıqsınu uyata.
Artvin töbägeneñ Xopa rayonında ul’tra-êndemik gömbä töre tabıldı. Barı tik Törkiyädä genä citeşüe öçen anı “Pluteus Anatolicus” dip atadılar.
“Hürriyet” gazetı “Rusiyä turistları Kekovada cäyne kürde” dip citkerä.
Antaliyanıñ Dämrä rayonında hawalar cılınu belän Rusiyä turistları kübäyde. Alar Urta diñgezneñ zäñgär sularında yaxtalar belän turğa çıqtı, diñgezdä yözde. Turistlar Dämrä häm Kekovo cirlegeneñ cännät buluın belderde häm yal öçen älege rayonğa qabat kiläçäklären äytte.
