Törek matbuğatına küzätü 23.02.2021

“Xäbär türk” gazetı yazğança Törkiyä ilbaşı Räcäp Tayyip Ärdoğan İzmirdäge Xalıqara Migraŝiya konferenŝiyasendä çığış yasadı.

Xäbärdä ilbaşınıñ tübändäge süzläre urın ala: “Awrupa Berlege Greŝiyağa 100 meñ qaçaq öçen 3 milliard yevrolık yärdäm kürsätä, Törkiyädäge 4 million qaçaq öçen berni êşlämäde. Awrupağa sıyınğan 10 meñnärçä süriyäle balanıñ qayda buluı, kem tarafınnan urlanuı belenmi.”

“Xörriyät” basması beldergänçä Törkiyä tışqı êşlär ministrı Mäwlüt Çavuşoğlu BMO Keşe xoquqları Şurasınıñ 46nçı utırışında yasağan çığışında separatist PKK terror oyışmasınıñ Ğıyraqnıñ Gara töbägendä 13 ğayepsez keşene şähit itüenä dön’yanıñ qabat tawışsız qaluın äytte.

Çavuşoğlu: “Xalıqara yärdämläşü bulmıyça häm xäzerge ikelätä standartlar belän bu yanawnı beterä almabız,” – dide.

“Watan” gazetı citkergänçä Süriyädä separatist PKK/YPG terror oyışmasına yärdäm kürsätkän öçen reakŝiya belderelgän Amerika Quşma Ştatları açıqlaw yasadı.

Xäbärdän kürengänçä AQŞnıñ êlekke Awrupa Köçläre citäkçese, general-leytenant Ben Xodjes tübändägeçä citkerde: “Törkiyäneñ ışanıçın qabat qazanırğa tiyeş bez. PKK/YPG mäs’äläsendä xata yasadıq. Törkiyä kebek berlektäş belän mönäsäbätlärgä zıyan saluçı bu xezmättäşlekne qabat küzdän kiçerü zarur.”

“Star” basması beldergänçä Prof. Dr. Xösäyen Işıksal Greŝiya häm Kipr Grek töbägeneñ çişeleş tügel, ä taşlama teläwen äytte. Törkiyäneñ Kiprda taşlama yasayaçağın kötüçe ike yaqnıñ yalğışuın assızıqlağan Işıksal: “Awrupa illäreneñ Könçığış Urta diñgezdäge iñ möhim häm strategik uyınçı bulğan Törkiyägä qarşı çıqmayaçağın irtä yäisä soñ añlayaçaq ike yaqnı kiläçäktä tağın da awır könnär kötä,” – dide.

“Yeni Şafak” gazetı yazğança Törkiyädä altın citeşterü arta. Ênergetika häm tabiğıy çığanaqlar ministrlığı soŝial’ media xisabında Törkiyäneñ altın citeşterüdäge soñğı 5 yıllıq kürsätkeçlären açıqladı.

Xäbärgä kürä Törkiyäneñ altın citeşterüe 2016da 24,5 tonna, 2017dä 22,5 tonna, 2018dä 27,1 tonna, 2019da 38 tonna, 2020 yılda isä 42 tonna bularaq çınğa aştı.