Törek matbuğatına küzätü 22.02.2021
22nçe fevral' könne çıqqan qayber törek gazetlarına küzätü
“Haber Türk” gazetı ilbaşı Ärdoğannıñ “AQŞ İranğa qarşı sankśiyälärennän kire qaytırğa tiyeş” digän süzlären alğı planğa çığara.
Törkiyä ilbaşı Räcäp Tayyip Ärdoğan İran däwlät başlığı Xäsän Ruxani belän telefonnan söyläşte. Ul anda AQŞnıñ yaña idaräseneñ Tähranğa qarşı ber’yaqlı sankśiyälären beterep iranlılarnıñ üseşenä qomaçawlawçı kirtälärne aluına ömetlänülären citkerde.
“Sabah” gazetı “PKKnıñ üterülären onıttırmayaçaqbız” dip yaza.
Törkiyä ilbaşı cämäğat’çelek belän êlemtä bülege räise Fäxretdin Altun küptän tügel Ğıyraqnıñ Gara töbägendä totıq itep alınğan 13 yaqlawçısız watandaşnıñ ğomeren özgän separatist terrorçı oyışma PKKnıñ üterüläre belän bäyle video urtaqlaştı. “Qanlı qullı PKK terrorçı oyışması 1984nçe yıldan birle Törkiyädä bäbäy, bala, xatın-qız, yäşüsmer, qart-qorı – bersen dä ayırıp tormıyça tınıç xalıqnıñ canın ala. Qayberäwlär kürmämeşkä salışsa da, bez bu qan tügülärne onıtmadıq, onıtmayaçaqbız,”-dip yazıla anda.
“Vatan” gazetı Rusiyäneñ Törkiyä belän S-400ne bergä çığaru turındağı belderüenä urın birä.
Rusiyä federal’ xärbi-texnik xezmättäşlek agentlığı räise urınbasarı Aleksey Frolkin S-400 hawa saqlanu sistemaların Törkiyä belän bergä çığaru mömkinlegen belderde. Ul bu xaqta söyläşülärneñ baruın äytte.
“Hürriyet” gazetı “Törkiyägä turıdan-turı çit il investiśiyäläreneñ artuı kötelä” dip xäbär itä.
Törkiyädä iq’tisad häm xoquq mäydannarındağı reformalarnıñ turıdan-turı investiśiyälärne tizlätüe kötelä. Bu prośessta çit illärneñ avtomobil’, könküreş texnikası, programmalaştıru häm logistika tarmağı belän qızıqsınuı artaçaq dip farazlana. İnvestorlarnıñ Törkiyäne saylawınıñ säbäpläreneñ qayberläre – kerem kiterüçe moxit, kvalifikaśiyäle êş köçe, investiśiyä klimatın küzallap bulu mömkinlege häm uñay logistika şartları.
“Star” gazetı yazğança, tulısınça biodizel’ belän êşläwçe berençe generator Törkiyädä çığarıldı.
İstanbulnıñ “Arken Jeneratör” şirkäte dön’yadağı berençe tulısınça biodizel’ yağulıqlı generator prototibın çığardı. Ul xaywan häm üsemlek qaldıqlarınnan yasalğan dizel’ne qullanuğa nigezlängän.
