Törek matbuğatına küzätü 24.12.2020
24nçe oktyabr' könne çıqqan qayber törek gazetlarına küzätü
“Haber Türk” gazetı Ärdoğannıñ AQŞ häm Awrupa Berlegenä äytkän süzlären citkerä.
İlbaşı Räcäp Tayyip Ärdoğan AQŞ häm Awrupa Berlege belän 2021nçe yılda yaña säxifä açılaçağın belderde. Ul Awrupa Berlegeneñ Törkiyäne üzennän yıraqlaştırıp strategik yalğış yasawdan tayçınaçağına, AQŞnıñ yaña ilbaşı Djo Baydennıñ ike aradağı mönäsäbätlärgä kiräkle iğ’tibarnı kürsätäçägenä ışanuın äytte.
“Star” gazetı “Oruç Reis Könçığış Urta diñgez sularında” dip yaza.
Seysmik tikşerenü korabı Oruç Reis diñgezdäge êşçänlegen däwam itü öçen Antaliya portınnan quzğaldı. Ul Demre mäydanındağı seysmik tikşerenülären tögälläp 30nçı noyabr’dä portqa qaytqan ide. Anıñ bu yulı êşçänlege 2021nçe yılnıñ 15nçe iyünenä qadär däwam itäçäk.
“Yeni Şafak” gazetı Törkiyäneñ iñ zur xärbi köymäse turında xäbär citkerä.
TCG Anadolu kiläse yılda diñgezgä töşereläçäk. 232 metr ozınlığındağı häm 32 metr kiñlegendäge korab xärbi oçqıç, boralaq häm keşesez hawa apparatı şikelle 30 danä texnika sıydıra. Ul, kiräk bulğanda, meñgä yaqın keşegä mediśina yärdäme kürsätä ala häm gumanitar yärdäm operaśiyälärendä xastaxanä köymäse bularaq ta xezmät itä ala.
“Sabah” gazetı “Cirle litiy batareyalar çığa” dip söyençe ala.
Dön’yada êlektrlı maşinalar qullanu zur tizlek belän taralğanda, älege avtomobil’lär öçen kiräkle litiy êlementına da ixtiyac arttı. Şimbä könne Törkiyäneñ İskeşähärendä şaxta litiye citeşterü ob’yektı açılaçaq.
“Vatan” gazetı Awrupa Berlegeneñ Törkiyägä sıyınuçılar öçen 485 million yevro yärdäme turında yaza.
Awrupa Berlege komissiyäse 2021nçe yılda Törkiyädäge migrantlarğa yärdäm itü proyektına 485 million yevro fond bülep bireläçägen citkerde. Älege aqça 1 million 800 million möhacirneñ ixtiyaclarına cawap birü häm 700 meñnän artıq migrant balasına belem birü öçen totılaçaq.
