Törek matbuğatına küzätü 10.11.2020
10nçı noyabr'dä çıqqan qayber törek gazetlarına küzätü
“Sabah” gazetı “Tizdän Könçığış Urta diñgezdän söyeneçle xäbär alaçaqbız” dip yaza
Törkiyä ilbaşı Räcäp Tayyip Ärdoğan Qara diñgezdä tabılğan 405 milliard kubometr tabiğıy gaz yatmasın xäterlätep, iğ’tibarnı Könçığış Urta diñgezgä yünältte. “Tizdän Könçığış Urta diñgezdän, inşalla,h söyeneçle xäbär alaçaqbız” dide ul.
“Hürriyet” gazetı ministr Çavuşoğlunıñ “Cirle häm milli tışqı säyäsät alıp barabız” digän süzlären alğı planğa çığara.
Törkiyä tışqı êşlär ministrı Mäwlet Çavuşoğlu: “Bez tışqı säyäsätebezdä törek milläteneñ êşquar quxın, vösdanlı häm ğadellek söyüçe mädäniyäten çağıldırabız. Ğamäldä häm söyläşülärdä köçle, cirle häm milli tışqı säyäsät alıp barabız,”-dide.
“Yenişafak” gazetı “Paşinyan ciñelüen iğ’lan itte häm Ärmänstan Qarabaxta birelde” dip yaza.
Ärmänstan xökümäte räise Nikol’ Paşinyan Azärbaycan häm Rusiyä däwlät başlıqları belän utnı tuqtatu öçen urtaq deklaraśiyä imzalawların belderde. Ärmän köçläre Kelbecer, Ağdam häm Laçınnan soñ Tawlı Qarabaxtan tulısınça çığaçaq. Rusiyä däwlät başlığı Vladimir Putin ike il arasında utnı tuqtatunıñ näq’ tön urtasında başlanuın xäbär itte. Azärbaycan ilbaşı İlham Aliyev isä Ärmänstannıñ cinelüe xaqında bolay dide: “Paşinyan kileşüne üz teläge belän tügel, Azärbaycannıñ timer yodrığı arqasında imzaladı”.
“Vatan” gazetı “Dön’yada 3nçe bulaçaq” dip xäbär itä.
Artvinda Yusufeli böyäse häm GÊS 247 metr biyeklekkä citte. Tämamlanğannan soñ ul ikelätä iyelgän beton arka kategoriyäsendä Törkiyädä berençe, dön’yada öçençe iñ biyek böyä bulaçaq.
“Star” gazetı “Şveśiyädä yıl bülägen Mäläknur Alevcan aldı” dip xäbär itä.
Şveśiyädä xalıqara Lulea texnik universitetı yılnıñ maqtawlı premiyäsen törek belgeç, psixolog Mäläknur Alevcanğa birde. Ul koronavirus kizüendä izolyaśiyälängän yözlärçe ölkän yäş’täge keşene buşlay däwalağan.
